拖大細K仔登場 入12碼助英軍贏波
朗尼全家總動員自編自導自演「溫情百戰騷」！前晚歐國盃外圍賽E組，第100次為英格蘭披甲嘅朗尼，帶埋老婆麥露蓮同「孖K」囝囝到場，賽前喺卜比查爾頓手上接過100場紀念喼帽後，比賽59分鐘搏得12碼並親自射入，為英格蘭追平1比1，前鋒拍檔韋碧克之後連入兩球，助「三獅兵團」反勝斯洛文尼亞3比1。朗尼溫馨演出，正好為周三淩晨熱身賽同蘇格蘭「內戰」降溫，希望英、蘇重拾「一家人」精神。
為英蘇大戰降溫
朗尼人生重要時刻，一家大細當然要捧場，佢更帶住兩位囝囝Kai仔同Klay仔行入球場，接受卜比查爾頓頒獎，場面非常溫馨。賽後朗尼再喺社交網貼一家四口溫馨合照，大曬幸福人生，果然做足全日主角。呢位曼聯當家射手今次以顧家好男人姿態，迎接為英軍第100戰，贏盡好評，充滿家庭溫暖感覺，甚至可以感染全國，減低嚟緊對蘇格蘭嘅火藥味。
事關蘇格蘭早前發起公投，要求脫離英國獨立，但失敗收場，難免激起英、蘇對立情緒。朗尼今次大曬溫情，充當「和平大使」作客蘇格蘭，或者可減少對手仇視。朗尼更同蘇格蘭國腳、曼聯隊友費查夾份買咗些路迪公園球場一個包廂，到時會安排雙方家人喺度睇波，似乎想再做多一次「溫情騷」，但門將赫特則獲準退隊休息，將無緣呢場大戰。
踢英超全球最好搵
另外，英國《每日郵報》早前向全球34個聯賽進行薪酬調查，發現喺英格蘭踢波係「地上至筍」，英超球員平均年薪接近230萬鎊遠超德甲同意甲，就連英冠球員平均年薪都可以排第8，仲勁過葡超同土超等聯賽！英格蘭球員荷包腫脹，連帶國家隊嘅表現亦有起色，周薪30萬鎊嘅英超打工王朗尼自然成為國家Icon啦！