經歷巴西世盃嘅慘敗後，西班牙呢隻「病牛」開始進行換血工程，隨住老將沙維同沙比阿朗素退役，恩尼斯達、大衞施華同法比加斯因傷落選，昨日淩晨歐國外C組主場對住白俄羅斯，係9年來首次冇呢5大核心壓陣，上次出現此情況要數到05年世盃外大炒聖馬力諾6球一役，好彩西班牙一向人才輩出，憑住艾斯高轟入世界波，加上巴塞孖寶布斯基斯及柏度洛迪古斯各省一粒，以3比0輕取白俄。
今場波特別多第1次，除咗荷西卡利祖、艾華路莫拉達等新人首度為國披甲外，最Sharp醒嘅梗係艾斯高嘞！呢位皇馬中場初次打正選，就接應佐治高基獻上嘅第1次助攻取得國際賽處子士哥，成場波掌控全局贏盡掌聲，難怪傳媒大讚佢係西班牙新Boss啦！
艾禾卡特炒魷
至於今年7月先接手塞爾維亞嘅荷蘭老帥艾禾卡特，喺日前I組歐國外遭丹麥反勝後宣布辭職。