序幕

不經不覺已經離開香港有一段時間,由第一站英國,之後法國,跟住意大利,終於嚟到希臘,
黃昏時間,天空有半邊已經染成橙紅色另一邊依舊見到天藍色,黃色街燈都已經開著,
再加上馬路上來來往往車輛嘅車頭燈,喺馬路上面縱橫交錯,
橙紅色,藍色,黃色,構成整個複雜又繽紛的畫面.

一個人坐係Piraeus港等上船,望住人來人往嘅碼頭,心情有D複雜,
我喜歡搭船,喺香港時住大嶼山,每日都要搭船返學返工,感覺已經成為生活一部份.
碼頭對我嚟講喺一個充滿回憶嘅地方,好多事都同佢有關.
Piraeus佢無香港碼頭嗰種繁囂,比人有幾分冰冷感覺.
可能因為已經唔喺旅行旺季,人流已經無咁多,唔洗同團體客一齊迫,少咗遊客自然無咁嘈,
心情都暢快好多.

終於等到上船,係一隻好大嘅郵輪,所有人開始慢慢登船,有人係連人帶車成部駛入船艙,又有好多同我一樣嘅背囊客,又有一家大細,大家都慢慢行入去船艙,入面有樓梯比我地行上上層搵位坐.
郵輪分幾層,有床位,有坐位,有甲板位,床位要訂,
我當初又無諗住要訓床,所以無訂位,咁只好揀坐位或者甲板位,重有餐廳d位都可以坐.

9月尾希臘天氣依然好熱,但係到夜晚就會好清涼,
海風吹起令人更加覺得冰冷,甲板位入夜後大風到連企喺到都驚吹落海,
所以只好選室內坐位,由於人唔多,所以好多空位,你鍾意點坐都無人理你,咁我就喺餐廳搵咗張可以伸直腳訓都無問題嘅位坐,今晚一於訓梳化.
其實好多人第一站都喺停Mykonos,
但係我想去Oia,所以決定先去Santorini,坐喺梳化慢慢整理行裝,計畫明天行程,食下嘢,睇下書,非常休閒,可能今日行咗成日有D攰,睇睇下書就訓著咗.

矇矇朧朧聽到人聲,原來已經差不多早上6時,看看窗外,天色開始轉藍色,應該好快日出,
所以立即起身梳洗之後行出去甲板,推開船艙門,冰冷海風打落塊面成個人立即清醒曬,
人聲係由甲板傳出,原來大家都想睇愛琴海日出,所以甲板上有好多人,雖然人多,但係都唔係太迫.
搵到個可以睇到水平線嘅位置坐低,靜靜欣賞眼前呢一刻,

太陽慢慢由海邊升起,將天空同海都變成金黃色,眼前景色好唔真實,好似睇緊national geographic d節目咁,真係好靚.
就喺我扮曬好型咁望海時,人聲中傳嚟結他聲,係一位睇樣應該尋晚已經喺甲板訓嘅鬼佬,鬼佬背囊友好堅,我一路喺呢幾個國家玩都遇到好多呢類人,佢地人生就係要四圍去同見識,無任何珈鎖,鍾意去邊就去邊,呢d先係真無腳嘅雀仔,真係型到呢.
佢一邊彈,一邊唱,雖然唔知佢唱咩野文,但係旋律優美,又帶一點悲傷,鬼佬把聲好磁性,好有感染力,如果我係女一定比佢冧死,睇怕佢都食唔少好嘢.

如果幾年前嘅我邊有咁感性,咪又係嗰D機不離手嘅廢青,無諗過幾年間成個人變曬,原來人有經歷先會成長.
呢一刻,我想起一個人,喺我生命入面最重要嘅一個人,佢同我講,愛琴海嘅日出係最靚,而OIA嘅日落又係最靚,所以我好想去睇下同感受下.

我今日終於睇到愛琴海日出,唔知呢一刻佢做緊咩?
好想好想同佢分享呢一刻喜悅,更加想同佢一齊睇呢個畫面,
好想再見到佢,

佢改變咗我,令我呢個廢青變咗,變得無咁廢,夠膽出去行一轉.
我第一次見到佢已經係幾前嘅事,當時我24歲,剛剛大學畢業.

Hi 我叫Leo,我讀IT,今年剛剛畢業,現在一條友住喺梅窩.
由畢業到今日都已經5個月,SEND咗8X張CV出去,有回頭都係得2次,
其他全部都音訊全無,
雖然話IT業唔好景,都無諗過會差成咁,

咁點解讀IT,因為鍾意唔洗見人囉.
由細到大最叻就係打機,對電腦多過對人,

平日都只會喺屋企,又唔出街,就算出去都只係行灣仔腦場,298,
去MK就只行信和,星際,正宗宅男一名,嗱,我係宅,我唔係毒.

屋企人有無話我?點會無,老豆老母日日都叫我唔好成日喺屋企,出去同D朋友玩下,但係識得最多都係打PS4識,連真名都唔知嘅機友.
我住嗰到係由梅窩碼頭行上山嘅細村,好多人都已經搬走曬,
只係得番村尾李生個仔同佢女友兩個人住,人地有時間都爆房啦,得鬼閑理我咩.所以我唔多朋友,有時好攪笑,喺梅窩大,但係次次落街去食嘢都有人問我係唔係啱啱搬入嚟住.......
大佬,我同你地D仔女同校架.
由此可知我平日存在感有幾高.

等咗咁多日,終於有一份interview,今次一定要成功,再搵唔到工我就彈盡糧絕,到時莫講話打機課金,就連開飯都成問題,到時又要去M記做part-time,讀U時因為唔夠生活費(主要係課金.....)所以成日返M記做part-time,唔可以再咁過日子.
大佬,嗰份人工邊夠我課,P&D又課,乖離又課,白貓又課,無機打我會死架.

今次只許成功,不許失敗,唔知係唔係太緊張,結果5點幾就醒咗..
宅咗係屋企咁耐,好似好耐都未試過早過12點起身,以前返學都係搭最早班船,
畢業之後都無再搭過早船.
醒咗又訓唔到不如今日早D坐船出中環,順便去碼頭間M記食個早餐先,

店員:[早晨歡迎光臨,要d....!嘩今日咩野事,Leo你尋晚又通頂打機呀?現在7點未到喎!]

   我:[:唔喺呀,今日要去interview,所以早D起身.]

店員:[原來喺咁,照舊?]

   我:[Yes,唔該.]

佢係威哥,係我之前喺到做嘢識,份人幾好,成日請我食野,
又照顧D細,所以拍佢做嘢幾開心,佢算係我最好朋友,
雖然年紀差好多,不過我地幾啱傾,睇A片口味都差唔多,都係美腿控,
威哥係見到亞婆過馬路都會走去幫手截停D車嘅人,心地好好,正義感爆曬燈.
但係有時覺得就算你幾好人,都未必有個好結果,

好似威哥咁,成四十幾歲人,都重係溝唔到女,可能真係柒咗咗少少咁,但係無就係無.
世界就係咁唔公平.

睇怕都係一條友就咁過埋下半世.
其實都好怕自己會唔會好似佢咁,平平凡凡咁就一世,

有時通頂打機之後又訓唔著,我都好鍾意坐喺M記食嘢,睇下D人返工返學趕船,
見到其他人好匆忙,生活奔波勞碌,每日就係返工等放工,
放工等放假,放假等出糧,每日都係做重覆嘅野,都唔知為咩?

忽然間覺得自己好似好抽離,好唔屬於呢個世界,
好似一隻鬼咁存在喺呢個世界,身邊所有嘢都同自己無關.

威哥:[喂!!Leo夠鐘啦,重係到睇女,快D追船啦,見工順利啦.]

無錯,坐喺到另一目的係睇女,比威哥講穿咗.
宅男指定動作.

慢慢行出M記,我又回歸呢個世界,又開始做返一個為咗生活奔波勞碌嘅平凡人.

向住碼頭方向慢慢前進,話比自己聽今日一定得,今日一定要見得成呢份工,
正當我喺腦入面模擬一陣點對應時,隻腳好似踢到D野,

睇下原來係一個黑色漆皮機套,一睇就知係名牌貴野,再睇真D,
原來係一部新出嘅IPHONE7,

喺見到電話嗰一秒立即睇下側邊有無人,無人就執咗佢,發啦今次,
賣咗佢點都夠今個月課金啦.

喂!等等,Leo,你唔喺cheap成咁呀,一部電話就睇到你人格,雖然我無錢啫,但係都未至於要做D咁嘢呀,

眼見四周一個人都無喎,點算,我又趕船,唔理啦,上咗船先啦,等機主打比我時再同佢講
電話喺我度,等我見完工先比返佢啦.

上到船一坐低電話就立即響,電話入面傳嚟一把女聲.

女:[Hello,唔好意思,你係唔係執到部電話呀?]

我:[係呀,我喺碼頭前面執到架]

女:[太好啦,頭先我以為留咗係屋企,點知返到屋企又搵唔到,原來真係跌咗,
你現在係唔係仲喺碼頭?我過嚟攞返呀]

我:[我已經上咗船,但喺架船啱啱開走左....]

女:[Oh,No]

我:[唔好意思呀,因為我趕時間所以唔可以喺原地等,你都係住大嶼山?咁不如你今晚返嚟時CALL我,到時再比番部機你啦,好唔好?]

女:[咁....]

我:[你放心啦,大家街坊唔會偷咗你部機.]
其實我有諗過架.....

女:[咁好啦....我到時再打返自己部電話搵你啦,唔該曬]

總算做咗件好事,希望真係好心有好報啦,
就係咁我就袋住人地部電話去見工啦.

今日見呢份工係一間外國公司嘅香港OFFICE,地址喺太子大廈,
由碼頭行過去都係好近,15分鐘就到,
由於有排都未夠鐘,咁喺附近行下,睇下中環OL,都係人生一大樂事.

我成日覺得返中環D女強人,啫係你會見到有個跟班喺佢側邊幫佢攞文件嗰D,好重殺氣,佢地有一股氣場,令到我呢D宅男唔夠膽直望佢地,
好似同我講緊:你行開D啦....咁.

不過....世事難料,之後發生嘅事.

我準時去到人地公司,

女職員:[早晨,有咩事可以幫到你]

我:[早晨,我係嚟interview架]

女職員:[哦,咁你跟我嚟]

佢帶咗我去一間細房.
沿路一邊睇下間office,睇下有無靚女先....
成間公司都唔係好大,數數人頭應該唔多個10人.

女職員:[你填咗呢份form先]

咁我好快填完,佢就帶我去另一間房

女職員叩門後聽到有把女聲叫:[come in]
咁佢同我就入去,
呢間房好大,出面係睇唔到房入面,又有無敵中環海景,如無意外呢位應該係今日我要打嘅最後Boss,

女職員:[Anna姐呢位黃生嚟interview]

呢位Anna姐望落去年紀都應該唔細,一頭長直髪,眼大大,不過開始有少少魚尾紋,
化咗一個淡妝,不過望落都幾靚,後生時應該好多人追.

Anna姐:[黃生,請坐]
我印象中除咗醫生同我講過呢句嘢,無咩人會叫我黃生同請坐.

我:[早晨]

Anna姐:[早晨!你嚟見IT,我睇過你份CV,覺得你都適合我地公司,我簡單同你講下我地公司個架構,
我地係美國個邊嘅分公司,負責亞洲業務,主要係做聯絡同銷售,由於喺香港公司啱啱SETUP所以公司人手唔係好多,部門都比較精簡,而IT由於係支援工作所以我地只會得一個位,即係話你要負責全公司所有同IT有關嘅嘢,咁有時都要幫下其他部門同事做下工作範圍以外嘅事

跟住佢就開始講公司background,介紹呢樣嗰樣.

我聽到呢到,一滴汗由額頭滴嚟,唔係亞話一條友做,要SETUP成間公司,又無SUPPORT,有咩事咪奶硬野,又要做其他工作以外嘅野佢似請雜工多D喎,但係呢份工唔做唔通真係返去做M記,同埋有樣嘢好怪,但係又講唔出,唔知點形容,就係呢位Anna姐,佢....

正當我喺到一邊聽一邊諗點應付,做唔做呢份工好呢...

Anna姐:[黃生你有無咩嘢問題?]

呢個時候,突然電話聲嚮起,

Anna姐:[唔好意思,我手提電話未.....]

佢講到呢到停咗幾秒,之後望住我同我講

Anna姐:[好似係你電話...]

我:[嚇!我電話?我記得我閂咗電話架,同埋我電話都唔喺咁樣鈴聲架,]

等等係我今朝早執嗰部電話!

咁我重唔立即喺個袋攞部電話出嚟咩.

一攞出呢,
Anna姐就話:[我部電話呀!!]

唔怪之得,硬係覺得怪怪地,佢把聲咁熟,好似邊到聽過啦,原來就係今朝先同佢講完電話,
佢就係電話嘅主人.

電話重未收線,咁我嗱嗱啉攞比佢聽
當佢聽完個電話之後就同我講

Anna姐:[原來你就係幫我執左部電話嘅人,真係咁啱]

我:[喺囉又會咁啱,執到你部電話重去你公司interview,嗱物歸原主]

Anna姐:[總之唔該曬]

佢對住我笑一笑,唔.....我唔知比咩嘢反應好,好似除咗亞媽會對住我笑,
我好似未試過直望一個對住我笑嘅女人.

Anna姐:[咁,如果無問題,星期一返工OK?]

我:[哦,好呀]

到我落到樓下一路行去碼頭一邊諗,諗諗下開始覺得有D唔對路,

@@!乜我應承咗返工咩....

我人生第一份正職,重要係搵到本科,好多人讀完大學搵份工都係同自己讀嘅嘢完全無關,咁讀呢做乜?
雖然有D擔心,不過既然都已經應承咗,死就死,攪唔掂最多炒魷.
就係咁,我就硬住下體,唔係,係硬住頭皮,去返工啦.

一如以往,太耐無早起,又驚唔知醒,結果又晨咁早醒咗,
哎,咁早醒不如去M記食個早餐先,
威哥:[Leo,咁早呀]
我;[係呀,第一份工喎,當然要準時返工啦]
威哥:[比心機呀,如果唔喺好快又返呢M記開工架啦]
我:[放心,點都頂到出第一期糧,哈,哈]
威哥:[到時記得請我食飯呀]
我:[一定啦]

坐喺到望住個碼頭,結果我都係成為每日營營役役,勞勞碌碌嘅打工仔,
人總要食飯,唔開工就無飯食,理想?唔係無,不過現在食飯緊要過理想,理想放埋一邊先啦.
唔知今日會唔會撞到Anna姐呢,

假如有一日我地真係喺路上面偶然咁撞倒,我地會點下頭問候一下,然后已經唔知講乜,因為你會發現,佢係公司高層.....
諗都無諗過公司高層會同自己住同一個地方,重要坐同一班船.

高層唔喺應該住愉景灣嗰D House咩,做乜會住梅窩呢D死窮鬼地方,
你話香港重有邊到上網會慢得過離島,真係回到未來咁,明明個個都用緊giganet
梅窩重行緊1.5M呀,龜速呀大佬,手機都快過佢呀,點B嘢呀.
講起都扯火.

講返Anna姐,佢又唔似本地人丫,梅窩有靚女我會唔知,
OK就算我唔知,威哥一定知,佢係玄門正宗鹹濕佬,點會逃得過佢法眼.
時候唔早,差唔多夠鐘上船啦,無咁好彩會撞到嘅.

一如所料係唔見嘅,都好,唔洗搵野講,平日都唔多識同女人講嘢,現在重要係靚女高層,邊識溝通.
其實可能我諗多咗啦,或者人地跟本唔記得你係邊位呢,自己存在感有幾高又唔係唔知.

一邊聽歌一邊打機,話咁快就到中環.
準時返到公司,同人事部攪完D手續跟住就佢去見下其他部門同事,
Admin亞May姐話公司好細,每個部門都係得幾個同事,其中有兩個部門都係得一1個人
一個就係會計,另一個就係我個IT部,

亞May姐又話食飯最緊要落雞汁....Sorry,我講錯,佢係話Sales team只有朝早會喺公司開下會,基本上係9成時間都會出咗去,所以長時間喺公司就得我一個男丁,啫係話有乜粗重嘢都會叫我[幫手].

終於行到去我個主場啦,一開門.

各位觀眾,歡迎嚟到巴西 里約熱內盧球場,今日球場氣溫高達36度.
營光幕左上方係一排排熱情而又齊心,全身一致黑色,帶有紅綠燈3色彩燈,身上插有一絛絛藍色Lan線嘅server
營光幕嘅右下方喺一台台同樣熱情奔放嘅MON,同木口木面嘅主機.
嘩,完全感受到佢地嘅熱情,所發出嘅高溫真係未行入去已經feel到.
嚟!!大家唔好比佢停,一齊跟我唱
We are the champions - my friend
And we'll keep on fighting till the end
We are the champions
We are the champions
No time for losers
Cause we are the champions of the world
見到呢個場面,睇呢將會有連番惡戰出現.

坐左喺房入面,深深吸一口熱氣,然後準備開工,
係我人生第一份正職嘅第一個JOB,我一定會做到好好睇睇,
唔可以衰比人睇.

無錯,第一個JOB就係................去開大冷氣.
好明顯,佢地係零電腦知識,熱成咁唔死機已經好好彩,真係先死機,後死人.

咁就真係開工啦,雖然我唔多識同人相處,但係對電腦我真係有一手架,
真係要佢行就行,走就走,除衫就除衫,完全唔會扭計架.
你話如果係女幾好呢.
不知不覺就食lunch時間,

未行出房,已經聞到唔同飯香,
果然,一出去見個個都係帶飯,
Reception亞Lili姐話中環食飯好煩,又貴,所以個個都係帶飯,
重叫我都帶,唔係呀話,男人老狗帶飯.......
咁睇怕都係我自己一條友食,

大家有無覺得奇,作為一個宅,我無乜點提公司D女同事呢,
正所謂久旱逢甘霖,突然喺你前面出現一個水塘,你重唔撲埋去,
好,咁我就形容一下呢個水塘有咩好喺呀嗱,坐穩啦,

有鴨嘴火龍,卡比獸,噴火龍,鯉魚王,章魚桶,河馬王,馬蹄露,方面港姐,欣宜,亞蘇,

等等亞蘇係唔係男人嚟架?
呢班.....乜野嚟架.

總之....一定係有人喺到放櫻花,如果唔係唔會咁多呢D PKMON,
快D搵精靈訓練員嚟捉走呢班PKMON.

好彩喺呢個鱷魚潭入面都有一棵荷花,就係Anna姐,
雖然熟女系一向唔係我杯茶,不過睇下又無防,
今朝我好似成朝都未見個佢,聽講好似去咗開會,今日可能唔返.

中環食Lunch又真係一件苦事呢,又貴又唔抵食,
唔係個個返中環都係上等人嚟架.

對於我呢D窮鬼就更大鑊,附近最平得Jollibee,
無法,總好過食7仔,
食完行左一陣,睇下女.
覺得都係腦場啱我多D,衫我又無興趣買,名牌我又買唔起,
都係返公司吧.

喺公司樓下等Lift時,突然有人喺後面叫我:[Leo!]

聽聲就知係Anna姐,
好采係佢叫我,如果我望見佢先,我諗我未必夠膽叫佢,
一陣佢話WHO ARE U咪PK.

當我擰轉頭一睇,黑色西裝褸白恤衫配一條窄身裙,重點喺黑絲加3吋漆皮高踭鞋,嘩呢一身行政人員look真係唔講得笑,側邊d麻甩佬視線都係望向同一個方向,就係望住佢對腳.

Anna姐:[點呀,第一日返工習唔習慣呀？]

我:[ok呀]

Anna姐:[好采你interview個日攞反個電話比我,如果唔你我今日就見唔到呢個客.]

我:[哦原來個日個電話就係今日你要見個客]

見佢手上攞住三文治我就多口問句:[未食飯?]

Anna姐:[係呀.]

我:[就咁食三文治夠唔夠架?]

Anna姐:[夠!我一向lunch都係食三文治]

咁細食唔怪之得身材咁fit啦
望住呢位靚太真係好難想像佢以前有幾多人追,
係喎,佢結左婚未架?

返到公司又開始各有各忙,
我又入番去房開工,開行冷氣果然無之前咁熱
咁先可以長期作戰丫嗎,
啱啱先上手大把嘢跟,
我都唔知攪左幾耐,
突然有人叩玻璃,望一望原來喺May姐

May姐:[重唔收工?]

我:[現在幾點呀?]

May姐:[7:30啦,呢到無OT錢架]

原來一做就已經7:30
我都無睇時間

係呀我對住部電腦好多時都係去到忘我境介,
如果IT係一門武學,咁我一定係IT界嘅段譽,天資聰明,無師自通,身附絕世神功......
嗱,我知你地想講乜,時得時唔得丫嗎,妖~~~

收工時行過Anna姐間房見到仲有燈光,仲未收工,睇怕佢都係工作狂.

慢慢行去搭船返梅窩,心情無乜特別,夜晚行中環碼頭其實好舒服,坐喺度等船,清涼海風吹過嚟令人心情暢快,絕對係忘憂靈藥,有時坐到連船到咗都唔想走.

總算完成第一日返工,返屋企打機.

返咗就嚟一個月工,大致上都攪得掂D嘢,無咩疑難雜症,公司個SYSTEM又係跟返美國唔洗點攪,所以不外乎都係條線鬆咗開唔到機呀, caps lock咗入唔到password呢D白癡嘢.

喺公司多數時間都係一條友,一條友做IT有個好處,就係你對住部電腦你做咩都係得你一個人知,我有權限可以開任何一部腦,公司有咩秘密我都知,我先係公司嘅隱藏大佬,嘩哈哈～
所以呢...............我成日喺公司B野,終於可以脫離1.5M魔咒.Yeah~~~

有時d同事無帶飯都會同佢地出去飲下茶咁,平時真係各有做,好少交流.
一來我宅,二來佢地d話題都係離不開,邊套劇好睇呀,邊條裙靚呀,邊到有大減價,759又有平嘢呀,我真係搭唔到咀.

不過有時都會八卦到D有趣野,原來Anna姐係未結婚,都有好多人追,但係佢又好似對D追求者無咩興趣.
Anna姐個秘書,隻卡比...唔係,係Eliza話上年情人節有人送99支玫瑰,結果Anna姐將佢分曬比D同事,佢話Anna姐係工作狂,好多時都做到好夜,所以邊有時間拍拖,佢地重好PK話會唔會係Les.
不過都唔出奇,好多女強人都覺得男人唔夠自己叻,所以好難搵到啱.
哎~~可惜可惜.

今日係出GAME同出糧係大日字,所以放工即刻狗衝去左買GAME,
係喎之前講過會請威哥食飯就今晚啦,

去到碼頭又未夠鐘,威哥今晚收夜,未有咁早食飯,不如買碗咖哩魚蛋食下
一邊玩手機,一邊食魚蛋,坐圍欄等船,完全無留意身邊有人企左喺到,當我一顎高頭一睇,

係Anna姐企喺我側邊,不過佢好明顯睇唔到我,佢只係好專注咁望住個海,
完全無視咗我,我嘅存在感又跌至新低.

我喺側邊望住佢,見佢好似好唔開心咁樣,好似好多嘢煩緊.
我成世人都未試過開解人,都唔識,

望住佢嗰一刻,我忽然間做咗一件我事後覺得非常膠嘅行為.
我隊咗碗咖哩魚蛋過去比佢,跟住講咗句好膠嘅嘢,

我:[食粒,魚蛋解千愁呀.]

佢可能唔知我喺側邊,比我呢個突如其來嘅舉動嚇咗一跳,無曬反應,
我地對望咗起碼超過3秒,我見佢雙眼好似有D異樣,開始覺得氣氛有D尷尬,我好似沖入咗佢嘅AT力場咁,大鑊!唔會暴走呱.
正當我諗緊點打完場,搵位走佬時,佢終於有反應啦.

佢望住我喺到笑,
我望住佢,就喺呢一秒,我伸出我強而有力嘅臂彎,將佢大大力咁攬實,
美人唔需傷心,你嘅傷痛就由我呢分擔,眼淚已經不能控制咁向下流,
我地開始擁吻,世界恍惚喺呢一刻停止咗.

Anna姐:[Leo!Leo?]

我:[嚇,咩事]

Anna姐:[你唔係話請我食咖哩魚蛋咩,做咩郁都唔郁咁望住我.]

我:[哈哈無嘢,啱啱諗緊其他嘢啫.....]

Anna姐:[好耐無食過咖哩魚蛋啦]

我:[咁食多粒]

Anna姐:[今日出糧唔同D Friend出食去下嘢,約女朋友去玩下丫嗎]
Anna姐你一嘢打中我兩個死穴,第一,我無乜成班嘅朋友,二我都無女朋友.

我:[我有,我...約咗個朋友喺梅窩食飯,不過佢未放工]

Anna姐:[IC]

Anna姐:[你剛才喺到好耐啦?唔好意思無留意你喺到]

我:[哦,唔緊要,我一向存在感都好低,我去做剌客真係一流,一定無人知]

Anna姐又喺到笑,

Anna姐:[我剛才個樣好似好煩好唔開心咩?]

我一邊食住魚蛋一邊講:[盲....都feel..到...啦]

見到佢有D尷尬咁笑左一下,之後就無再出聲.
船到咗,大家都一齊上船,我同佢坐喺船尾,
佢依然無出過一粒聲,睇呢佢真係好唔開心,
點算好,成程船,唔通我攞部手機出嚟玩咩,雖然我都想....
個氣氛好詭異,早知我就唔請佢食魚蛋啦,靜靜雞行開咪算囉,
坐咗好耐,真喺頂唔順,決定搵d嘢分散下佢注意力,
我:[Anna姐我有d嘢想問下你]

Anna姐:[問乜嘢?]

我其實係想問下你係唔係les,不過咁問好似無咩禮貌咁,都係唔好問呢d問題.

我:[你點解會住梅窩?]

Anna姐:[我鍾意搭船,以前喺美國住都成日搭船]

我:[嚇!咁做咩唔住南丫島,個邊又多鬼佬,同你同聲同氣]
佢面色一沈,我好似講錯嘢....

Anna姐:[唔係個個都鍾意鬼佬架]

Anna姐:[梅窩唔好咩?靜靜地]

我:[梅窩靜?都係嘅,以前東湧線未通車,梅窩假日都唔知幾嘈幾多人,東湧線通車之後就少咗好多人入梅窩]

Anna姐:[你喺梅窩住咗好耐?]

我:[我喺梅窩大,不過D街坊都成日以為我新搬入去,又係存在感問題]

Anna姐:[你都幾無自信喎,後生仔比D信心自己]

今次到我尷尬咁笑左一下,
小姐對住你有幾多男人可以有自信咁起到頭,sorry講錯,係抬起頭.

我:[你喺梅窩住咗幾耐?點解我以前未見過你]

Anna姐:[我搬咗入嚟半年左右]

我:[咁唔怪之得啦,咁啱我嗰段時間成日都喺屋企]

Anna姐:[喺屋企?喺屋企做咩?搵工]

我:[....係..呀,搵工...哈哈]
唔通話比你知我日日喺屋企做廢青咩.

我:[你喺美國住咗好耐?]
Anna姐:[我係ABC,]

我:[美國生活唔好咩,做咩唔喺嗰邊做嘢要呢香港呢邊]

Anna姐:[你都幾八卦喎]

我:[哦,問下啫,問下啫]
@@,又中地雷.

Anna姐:[總公司要喺香港setup office,所以派我過嚟]

我:[你係呢間公司做咗好耐?]

Anna姐:[十幾年]

我:[嘩~~好難想像喺一間公司做十幾年,咩嘢青春都比曬佢]

Anna姐一聽到我講呢句嘢好似點中咗佢個G..
唔係,係死穴,佢輕輕震左一下,望住窗外面粒聲唔出,

嗱,又係呢個表情,同碼頭時一模一樣.
點算,又行返回頭路.

呢個時候我喺袋到攞咗部手機出呢,唔係打機呀.
我攞咗對earphone比佢, 佢望住我問我,[做咩?]

我:[聽下]

Anna姐:[咩呢架?]

我:[聽下先啦,你呢D ABC應該無聽過架啦,好嘢呢架.]

佢有D唔願意咁窒咗對earphone入耳.

好,起歌


灰色軌跡

酒一再沈溺 何時麻醉我抑鬱
過去了的一切會平息
衝不破牆壁 前路沒法看得清
再有那些掙扎與被迫

踏著灰色的軌跡 盡是深淵的水影

我已背上一身苦困後悔與唏噓
你眼裡卻此刻充滿淚
這個世界已不知不覺的空虛
Woo...... 不想你別去

佢好專心咁聽曬成隻歌.

我:[我一唔開心就好鍾意聽呢隻歌,舊就舊咗D,不過D歌詞寫得好正.]

見佢抹咗眼角D眼淚一下,笑咗一笑,然後講:[我無事,Thanks]

點睇都唔會係無事啦,不過我可以做同識做都已經做曬啦,
真係唔知可以點幫,你話我係你條仔就話比個膊頭你挨下啫.

呢個時候啱啱好到碼頭,咁我地都落咗船.
喺碼頭,大家方向唔同正好準備分開行.

我:[我重有好多正歌架,以前D舊歌好正架,現在D新歌都好垃圾嚇,有機會比你聽下]
佢笑咗一下.

Anna姐:[唔該曬,我真係無事啦]

我:[無事就最好啦]

Anna姐:[不過睇唔出你都幾細心,你女朋友應該好幸福,Bye]

望住佢身影慢慢遠去,雖然有d唔放心,不過都無辦法,我又唔係上帝,唔識變條仔or女出嚟陪佢.

不過Anna姐,你做乜臨走都要打多我一嘢,我都話無女朋友囉

已經成個星期,見Anna姐又好似真係乜事都無喎,依然係女強人,照常返工做嘢,間唔中出嚟同d同事吹下水,見到我都有講有笑,有時搭船撞到一齊坐我都會介紹D正歌比佢聽,佢又會介紹D英文歌比我,咁睇嚟真係無嘢.

幾個月後要去酒店攪event,嚟緊都會好忙,原本我就好得閑,因為唔關我事,點知Anna姐話我得閑叫我幫手,所以我都要去做苦力,啫係話無時間係房B 4仔啦,哎~~

我睇少D無所謂呀喺公司幾時睇都得,威哥先大鑊,我做咗呢到之後,已經變成4仔供應商.
斷人片源等如殺人父母呀,無鹹片睇嘅男人可以好恐怖架.

今晚攞住D存貨比佢先,費事佢谷精上腦.

收工時行過Anna姐房,今日佢居然早過我收工,奇蹟呀.

食完飯返屋企打機先,威哥今晚收夜,夜D先出去搵佢吹水飲嘢.

一打就幾粒鐘過咗,時間都差唔多要出去.
係M記坐咗陣等威哥收工,唔知幾時開始梅窩有酒吧,開下又一間,開下又多一間,
我地D窮鬼就唔會去啦,留比D鬼佬啦,不過唔知點解有D鬼佬一飲大兩杯就失控
所以間唔中都有打交.

兩條麻甩佬去7仔買咗幾罐啤酒少少嘢食就去咗M記出面坐,
隔離D鬼佬飲喜力,我地就飲生力,
佢地食烤雞翼,我地食鹵水雞翼
佢地望海,我地都係望海,哈哈

我:[你D糧草呀]

威哥:[唔該曬喎]

威哥:[喂你公司無女溝咩,見你返咗一排工都重係咁,放工就返屋企打機.]

我:[PKMON就大把.]

威哥:[唔係呀,叫你唔好睇咁多AV片架啦,睇下現在睇唔返D平凡嘢啦.]

我:[好呀,咁我以後都唔B,你都唔好叫我B喎.]

威哥:[咁又唔好.]

威哥:[真係一件正常D都無?]

我:[唔係無,有個幾靚架,不過佢係公司最大嗰個喎,女強人呀大哥.]

威哥:[咁你都係食自己啦.]

我:[挑!講呢D.]

我同威哥都成日都係咁,講下女,邊飲嘢邊吹水,幾開心架.
吹吹下水,威哥叫我睇下嗰邊,

我:[有咩睇呀?]

威哥:[靚女呀]

我:[邊到呀?]

威哥:[嗰邊呀,酒吧對出呀]

離遠見到一個長髮女人喺到講電話
我:[嘩,睇背面你就知靚女咁勁,果然係玄門正宗鹹濕佬呀]

威哥:[我成日收工都見到佢一個人坐喺碼頭架.]

我:[梅窩有靚女出現都唔單聲,好兄弟丫.]

威哥:[唏,唔啱你架,睇樣佢大過你好多下.]

我:[梅窩,靚女,大過我....唔係咁啱呀]

威哥:[乜嘢咁啱?]

望見遠方位女士,佢身高,外型,似啦似啦,
等到佢轉頭望向呢邊時,Yes~~中咗,真係Anna姐
雖然太遠聽唔到佢講乜,不過睇動作似同人鬧交.

我:[佢咪我頭先講嗰位高層女強人BOSS囉.]

威哥:[嚇,咁邪.]

威哥:[喂介紹我識呀,唔啱你啱我呀]

我:[你訓醒未?人地大把人追都唔要呀,就憑你,你一係剪咗條J]

威哥:[點解?]

我:[佢Les架.....我估]

威哥:[挑,估喎.]
講講下,酒吧有班飲大咗連直線都行唔到嘅鬼仔行咗出呢,
唔知點解我突然間有個下意識佢地會攪Anna姐.

真係說時遲那時快,班鬼仔真係有所動作.
@@!六合彩又唔見我中.

正當我仲未嚟得切反應時,有人已經比我快一步衝咗過去.
威哥直頭食咗成打偉哥咁,衝過去想一個打十個.
一輪拉拉扯扯之後,威哥已經推開咗幾條鬼.

Anna姐:[STOP~~~,STOP~~~,HELP~~~]

我:[人地幾條友呀STOP乜鬼呀,走啦.]

我衝到過去一手拉住威哥,一手拉住Anna姐,向相反方向跑.
跑咗無耐我就停咗,喘曬氣講

我:[唔洗跑啦,佢地貓成咁,佢地跑唔到架啦.]

Anna姐:[唔該曬你同你Daddy]

我:[Daddy!?]

威哥:[嚇!]

我:[嘩哈哈~~~]
我真係笑到訓咗喺地.

威哥:[乜我似佢老豆咩]

Anna姐:[唔好意思,我以為...你喺Leo Daddy]

威哥:[乜我個樣咁老咩?]

Anna姐好唔好意思咁講:[唔係]

我笑完之後先解釋返比Anna姐聽佢係我朋友,佢叫威哥,佢唔係我老豆.

威哥:[都咁夜,不如我......]

我:[Anna姐我送你返屋企.]

唔知點解,嗰一刻我搶先要送Anna姐,可能唔想比威哥送呱.

Anna姐:[咁....好呀,唔該.]

我:[咁BYE,BYE啦,Daddy~~]

威哥:[死仔.]

一路行我就同Anna姐講:
我:[頭先無事丫嗎]

Anna姐:[無事]

我:[梅窩以前好太平,不過多咗酒吧之後就雜左D,以後夜晚去嗰邊就小心D]

Anna姐:[唔.]

Anna姐:[咁啱你地又會係乎近?]

我:[我同威哥成日喺嗰到飲野]

Anna姐:[原來係咁,咁真係好彩]

Anna姐:[不過無你地我都一樣可以攪得掂]

我:[嚇,有無咁勁呀]

Anna姐:[我玩過下跆拳道,你係唔係想試下]

佢即刻做咗個跆拳道準備起腳嘅姿勢,我心諗原來你唔只係女強人,仲係女超人




我:[頭先你同男朋友講電話?]
其實我想問係唔係同女朋友架.

Anna姐:[你真係幾八卦下]

幾秒後佢話:[係]

我:[嘈交?]

佢立即黑面同我講:[唔關你事]

我:[OK]

幾秒後佢又話:[係]
佢地因乜事嘈交我就真喺唔夠膽問

行行下佢又講:[佢喺美國,我地分開兩地,可能因為咁所以成日嘈]

我心諗異地戀,通常都無乜好結果.

Anna姐:[我地已經一齊好耐,但係唔知點解,始終覺得會無好結果.]

我:[咁你明知無好結果你又做?]

其實我唔知點解會爆咗呢句嘢出嚟,但係我呢句說話就好似一把刀咁插咗過去,
佢直頭行行下停低咗.

喺街燈影照下,望住佢木無表情個樣,
雙眼已經紅曬,佢已經忍唔住,眼淚流過不停.
我知我又講錯野.

我:[Sorry呀,我唔係有心架.]

我諗佢已經聽唔到我講乜,佢好大力咁一手推開我,
我幾乎企唔穩跌低.

望住佢向屋企方向跑,
我原本想追上前面,不過見佢都跑咗入屋咁唔通追入屋咩.
一路一條友行返屋企一邊諗,

PK啦,今次大鑊哪,我會唔會無咗份工架.

距離上次酒吧單嘢已經成個幾星期,
Anna姐如常返工,又好似乜事都無發生過一樣,勁呀.

不過係對我就黑口黑面,連say hi都無,喺船見到都分開坐,
睇嚟我呢一刀扣曬佢D LP,佢要儲氣回血.

呢次係我人生入面第一次激到一個女人咁嬲,亞媽唔計啦.
點都要做D嘢,如果唔係日子好難捱落去.

食飯時想走去買張道歉卡,睇一睇,
嘩,我睇錯乍一張卡要成80蚊,重要無乜選擇,有無九兩菜呀.

唉~~原來道歉成本咁高,唔怪之得D高官做錯嘢永遠都唔會道歉.

返到公司靜靜雞放咗張卡入佢房,睇下有無feedback啦,
希望唔會好似我寄出去D CV咁啦.
點知到咗放工都依然無feedback,睇呢80蚊凍過水.

第二日返工,成朝都無見過Anna姐,咁我照常喺房開工啦,
做做下嘢突然電話響,睇怕又唔知邊個唔記得password跟住撞死埋比人Lock咗機.

我:[喂!咩事]

Anna姐:[Leo,一陣一齊lunch?]
我嗰一刻係個心叫左出呢,Yeah~~,80蚊無掉落鹹水海

我:[好呀]

Anna姐:[咁你去餐廳搵位先,我一陣到.]

我:[OK]

收線後
我:[YES!!]

到咗食飯時間,中環D餐廳唔係講笑,你唔搵定位你都唔洗指意有得食.
食乜對我呢講又係一個難題,我喺到返工咁耐都係食快餐,好似無試過入餐廳食.
又唔知Anna姐想食乜?點好?

結果我去咗一間好出名國際級餐廳
女店員:[你好,歡迎光臨,要D乜野]

我:[唔該兩個魚柳包餐,可樂,加多個蘋果批.]

無錯,係M記,
嗱你地唔好嘈啦,放低你地D中指先,人地ABC呢架,食M記有乜咁出奇.

攞住兩個餐行過去Anna姐個張檯,今日佢著住一套白色套裝裙配紅色高踭鞋蹺住腳坐喺到,
紅色唇膏配上白裡透紅嘅膚色,纖秀嘅身型,修長嘅一雙美腿.
當佢用手撥開耳邊嘅頭髮時,一舉止一投足,都足以KO在場所有雌性生物.
嗰種氣質跟本唔應該出現喺M記.

喺人群當中佢直情好似打咗spotlight一樣,每一個行過嘅麻甩佬,廢青,西裝友都會忍唔住偷望幾眼,從佢地嘅眼神中就睇得出佢地有幾咁羨慕我,如果唔係我,你地班友邊有咁機會見到呢個靚女呀,嘩哈哈哈~~~~

Anna姐:[Leo!Leo!]

我:[Yes!!]

Anna姐:[又諗乜嘢咁入神?你成日都係咁發呆架?]

我:[唔係,唔係,間唔中啦,哈哈]

Anna姐:[你知唔知我對上一次收卡係幾時?]

我:[上年情人節?]

Anna姐:[year 9]

我:[Oh,咁真係幾耐下]

我:[男朋友?]

佢望住我微微咁笑一下,甜到呢,嗱嗱嗱呢種笑容重唔係初戀!!嘩,殺死人咩.

Anna姐:[秘.密.]

我:[超]

我:[上次好對唔住呀,亂講野.]

Anna姐:[過咗啦,由得佢啦,我都無嬲你.]

我:[無嬲我?你又成個星期對住我黑口黑面?]

Anna姐:[細路仔做錯嘢係唔係要受罰.]

我:[WT..................................]

Anna姐:[其實你個句說話講得好啱,我明知錯都要做,應該要做決定]

Anna姐:[多謝你.]

我:[有決定都係好事呢,唔洗拖拖拉拉.]

Anna姐:[你講到我好似分手咁喎,你唔比我係返美國結婚以後都唔返嚟架.]

我:[唔好丫,分手好丫,唔係,唔好唔分手呀,唔係唔係,]
我:[我意思係唔好分手,都唔好唔返嚟呀.....]
我係到講咩呀.

佢又對住我笑,佢真係笑得好甜,好似好耐無見佢笑得咁開心.

Anna姐:[原本今日諗住請你食飯,點知你食M記,Well 多謝你呢餐喎]

我:[嘩你話曬都係高層喎,咁屈個下屬請食飯,嗱唔可以咁架.....我今個月重要課金架,重有新GAME出呀.喂!!]

呢餐飯我地食得好開心,唔知以後仲有無機會同佢一齊食飯呢.

今日係一個特別日子,
COD出?no,no,no
白貓有新角?,no,no,no
旬果有新片出?no,no,no

今日係小弟牛一,
有乜慶祝?無.
宅男係咁架啦,唔係你想點.
知我生日我諗喺地球唔多過3個人
一個係我老豆,一個係我亞媽,另一個係May姐.

無嘢嘅,just another day

係屋企打咗成日機,又無嘢做,威哥返咗大陸,好似係去做李尋歡
佢有叫我去架,不過我無興趣,等我去到佢咁年紀又無女先去啦.

一到呢D日子唔知點解就姨丈到,
算!話曬牛一,今晚一於去食餐好,

以前星期六,日你想喺梅窩食晚餐你最好訂定位,如果唔係一定無得食.
現在,哎~~小貓三四.

我:[老闆唔該]

老闆:[要乜]

我:[一碟椒鹽鮮魷,豉汁炒蜆,蒜蓉粉絲蒸扇貝,大生力.]

老闆:[咁多食唔食得曬呀.]

我:[得]
心諗多事啦你.

正當我坐喺到等食時,聽到背後一把熟識嘅聲音,

女:[唔該老闆,外買,我要......]

我擰轉頭見到一身casual wear嘅Anna姐


我:[Hi Anna姐]

Anna姐:[Hi Leo]

我:[買外買呀?]

Anna姐:[係呀,]

Anna姐:[你呢?又同威哥食飯?]

我:[唔係,一條友.]

Anna姐:[IC]

老闆:[你地識架?一齊囉,反正佢叫咗好多嘢驚佢食唔曬.]

我:[多事啦你]

老闆:[係丫嗎,食唔曬浪費食物呀.]

Anna姐:[咁...好呀.]

我:[係喎都唔記得你住呢到上面.]
Anna姐係住喺呢到上面對住海嗰一排House.

我:[成日嚟買外買架?]

Anna姐:[間唔中]

我特登好大聲講.
我:[下次唔好嚟呢間呀,個老闆好多事架]

佢又喺入面好大聲咁回我
老闆:[咁係呀丫嗎,食唔曬又叫咁多浪費呀.]

我:[啤?]

Anna姐:[OK]

Anna姐:[做乜今日一個人叫咁多嘢食?]

我:[今日我牛一]
Anna姐:[牛一?]

我:[生日呀.]

Anna姐:[IC,HappyBirthday.]

我:[Thanks]

Anna姐:[點解一個人過生日,唔同女朋友一齊慶祝?]

我:[我無女朋友點慶祝?]

Anna姐:[咁唔同friend?]

我:[我都話無囉...]

我:[Sorry,今日有D躁]
可能兩杯到肚,又可能係呢D日子,
我從未試過用咁語氣同Anna姐講野.

Anna姐:[唔緊要,係呢你點解一個人住梅窩?]

我:[被迫]

Anna姐:[同屋企人嘈?後生仔有時同屋企人嘈下好正常,屋企人無隔夜仇架.]

我:[我都好想同屋企人嘈.]

Anna姐:[點解?]

我:[以前成日覺得老豆老母好煩,我又無食煙飲酒吸毒,係宅D啫,咁都唔得,成日話我呢樣話我個樣,但係原來比人煩都係一件幸福嘅事,4年前我啱啱讀YEAR 1,有一日我上上下堂收到電話,因為交通意外我父母咁就走咗,真係好突然,我成個腦一片空白,無曬反應.]

我:[平日都係有老豆老母照顧,覺得係理所當然,但係一無咗,真係唔知點算
佢地走左之後一個月,呢一個月我食勻曬所有超市杯麵,百佳,惠康,759,7仔,AEON,OK
我通通食勻曬,嗰一刻我真係頂唔順,我真係崩潰,我唔想再食杯麵,你知唔知我做乜?]

Anna姐:[你做乜?]

我:[我衝咗入廚房]
Anna姐:[之後呢?]

我:[我攞起把菜刀,我同自己講,我好掛住亞媽以前煮D嘢食,我好想再見到佢地,我好掛佢地呀.
我攞起刀,心諗,一刀,只要我一刀拖落去隻手度我就死硬,我就可以去搵佢地,我唔洗再食杯麵.]

我:[把刀一邊震住一邊慢慢放落隻手度,我手腕開始感覺到刀身嘅冰冷,
我不斷同自己講,拖落去啦,拖落去啦,一嘢就夠架啦.]

Anna姐:[最後都係無做到?]

我:[唔]

Anna姐:[諗通左死唔係辦法?]

我:[唔喺]

Anna姐:[咁係咩嘢令你回心轉意?]

我:[咁啱有電話響,PS4機友19solidsnake打比我問我出咗COD,今日打唔打.]

Anna姐:[你個機友救返你]

我:[YES]

我:[我老豆亞媽佢地無咩嘢留比我,得呢一層村屋,之後所有生活都要食自己.]

我:[其實我好掛住佢地呀]
到咗呢一刻我已經feel到我D眼淚滴到成檯都係.

Anna姐好溫柔咁捉實我隻手,我係第一次拖佢隻手,上次酒吧單嘢我都只係拉佢手臂.
佢隻手好柔軟,好溫暖.

之後飲咗好多酒,我都唔記得發生咗咩嘢事,只係知我貓咗,有人扶我返屋企,入屋又再劏過.

第二朝起身個頭痛到爆,好似同曹星如打完一場咁,唔係,係比曹星如打完一身先真.
飲杯水飲清醒下先,坐喺床上面,睇住個廳,
唔記得介紹,由於一條友住,所以我將以前喺房入面嘅嘢全部放曬係廳,房用嚟放雜物.

望住我呢個小天地,今日睇落好似有D唔對路,點解今日間屋咁亁淨?
我記得我尋晚劏到一地都係架,重有地下D雜物唔見曬,
最恐怖係我床邊D用過嘅紙巾同飛機杯都唔見曬.
嗱,唔好問我做過乜呀.
尋晚唔好同我講係Anna姐送我返屋企呀.OH @@~~~~~~~~~~~~~~~~~~~~~~~~~!!

正當我頭痛緊喺屋入面發生嘅事.

門鐘響起,嘩! 我真喺嚇咗一跳,乜個門鐘仲會響咩,我好似幾年無聽過佢出聲喎
打開門,見到一位我唔係好想呢一刻出現喺度嘅人,Anna姐
啫係話佢尋晚送我入屋重幫我清潔埋間屋,

Anna姐:[Morning,MAY I]

我:[....Sure]

Anna姐:[你尋晚飲到好醉]

我:[你送我返呢架?]

Anna姐:[係呀,你仲嘔到我成身都係.]

我:[嚇!]

Anna姐:[所以我攞咗你一件衫換呀,如果唔係我無衫返屋企呀,我下次洗乾淨先比返你,OK]

我:[哦,OK,OK]

Anna姐:[食D嘢先啦,]
佢買咗碗粥比我.

我:[唔該曬,又麻煩到你,重要你幫我執屋.]

Anna姐:[下次心情唔好就唔好飲咁多啦.]
佢又用佢對柔軟嘅手輕輕咁拍咗我手背一下.

Anna姐:[你一個人住間屋都幾亂下喎.]

我開始feel到塊面好熱,額頭開始冒汗.

Anna姐:[見你無嘢咁我走啦,BTW后生仔唔好用咁多{嗰D野}呀,小心身體.
ByeBye.]

OH NO~~~~可唔可以比個窿我娟入去呀.

呢排每次見到Anna姐都有D唔好意思,可能因為上次醉咗,總之.....尷尬啦

今日我做咗速遞,點解?事源係Anna姐無返工,May姐話佢請病假,
原本都唔係D乜嘢問題,不過收工前,May姐走嚟問我

May姐:[Leo]

我:[乜事?]

你同Anna姐都係住梅窩?

我:[係呀,乜事?]

May姐:[係咁嘅,之前Anna姐話會有個美國寄過嚟嘅包裹,佢話urgent好似幾緊張咁,
今日啱啱收到,咁見佢又好似好急咁,嚟緊又星期六,日,不如你攞比佢啦.]

我:[咁...OK]

May姐比咗佢個地址我,其實之前送佢我已經知,不過費時同May姐講,
一陣又要解釋.

攞住個輕飄飄嘅包裹坐船,心係度諗,美國,又好緊張,唔洗問男朋友寄嚟,
唉,真係有D酸酸地,不過算啦,見係Anna姐,第二個我真係唔理.

去到佢屋企,按門鐘,無人,再按,都係無人,

睇嚟出咗去,又話病?

企咗陣見無人應,原本諗住走,點知呢個時侯見屋入面有燈開咗.

原來有人,可能訓咗.

一打開門,

我見到Anna姐一臉病容,

Anna姐:[Leo係你呀?]

我:[係呀,]

Anna姐:[入嚟先啦]

入到去坐低係梳化,

Anna姐都坐咗係度,
Anna姐:[咩事呀?]

我:[無,May姐叫我攞件包裹比你,]

我放低件包裹係喺梳化上面,

Anna姐望住件包裹無乜反應,

我見佢好似好唔對路,塊面好紅,我一摸佢額頭

我:[你發燒呀]

Anna姐:[嚇]

我:[你有無食藥呀?]

佢指一指檯面,
我過去攞咗d藥比佢食,

佢訓咗係梳化休息,好似訓著咗,

原本見佢訓咗我就走,

不過都係有d唔放心所以我無走,係佢訓緊嘅時侯入廚房睇下雪櫃入面有乜,
睇呢最多係菜同急凍嘢,都可以煮定d嘢食,等佢醒咗有得食,
坐喺佢側邊睇住佢,不知不覺我都訓咗.
Anna姐:[Leo!]

我即刻醒一醒,

我:[你無事丫嗎]

Anna姐:[唔,食完藥訓咗一陣好好多啦]

Anna姐:[你一直喺度?]

我:[係呀,見你上次照顧我,今次到我照顧返你啦]

我:[起身食D嘢先]

Anna姐:[唔]

我攞咗D之前煮好嘅嘢食出嚟,佢有D吃驚

Anna姐:[你煮架?]

我:[Sure,都話唔想再食杯麵所以咪學煮嘢,都煮得唔差架,試下.]

我地坐低咗,佢食食下突然間衝咗入廁所,閂咗門.
我跟住行過去係門口問:[唔係咁難食呀?]
但係只係聽到佢喺到喊,我心諗難食成咁?無幾耐終於有回應.

Anna姐:[唔係呀,好好食.]

又過咗一陣,之後佢開返門抹乾咗D眼淚,等佢平靜返,我地坐返喺廳繼續食飯.

我忍唔住問佢:[剛才做乜喊?]

Anna姐:[從來都無人特登煮一餐飯比我食]

Anna姐:[我好開心,好多謝你.]

我有D唔好意思講:[其實我都從來未試過特登煮一餐飯比人食]

見到佢係喺度微微咀笑.

我:[唔洗客氣,你鍾意食下次再煮比你]

我:[你面色好咗好多,]

Anna姐:[你自己都食多D]

我:[我夠啦]

食完我幫佢手洗埋D碗,

Anna姐:[唔洗啦放喺到我會洗]

我:[唔得,要個病人洗碗我做唔出]

佢笑咗一嚇,無再阻我,

洗完我同佢坐低係梳化

我先記得:[係喎,你個包裹呢?]

佢望一望,攞係手

我:[男朋友送?]

Anna姐:[唔]

我:[咁做乜唔拆?]

我:[係唔係D三級嘢呀?係我走先啦,]

佢好大力咁打咗我一嘢,
我:[嘩好痛~~你係唔係病架,仲有力打人嘅.]

見佢拆開咗,係一個深紅色嘅錦盒,打開一睇,入面係一條手鏈,睇樣似貴嘢.

佢望住條手鏈,無乜特別反應,好似好多嘢諗緊

我:[收到男朋友禮物咁反應嘅?]

佢望一望我,無答我,
我心諗我又講錯嘢?

佢放低咗條手鏈
Anna姐:[佢話有嘢寄比我,當然開心有所期待,但係當收到,又係唔係我想要?
物質上嘅嘢我又唔稀罕,其實我想要乜連我自己都唔知.]

Anna姐:[其實今日係我生日.]

我:[嚇!原來我同你同月生日架,我同你生日都算多災多難,我就醉咗,你就病咗.]

生日男朋友唔係身邊,又病,唔怪之得咁表情

我睇睇錶,十一點半.

我:[我出去一陣你等一等我.]

佢一臉茫然,

10分鐘之後我返去Anna姐屋企.

佢望住我問:[你去咗邊?]

我攞咗一件係7仔買嘅香蕉蛋糕出嚟.

仲係威哥度攞咗支生日蠟燭

我點著咗支蠟燭唱咗Happybirthday!!

我:[生日點可以無蛋糕架,粗粗地7仔香蕉蛋糕頂住先.]

佢又開始眼濕濕,

我:[快D吹咗蠟燭先啦就呢十二點啦,許個願啦]

吹完蠟燭咁就切咗件蛋糕一人一邊食咗.
見佢一邊食一邊微微咀笑,睇呢心情好返好多.

我:[你一個人住間屋都幾整齊下喎.]

我:[見你無乜嘢咁我走啦,BTW飲多D水,記得食藥小心身體呀,ByeBye]

佢又係到微微咀笑,可能知我串佢呱.

佢送我出門口
我:[見到你開心返我就放心,我...無乜特別意思架,只不過..,總之,想睇見你笑返,咁我走啦]

Anna姐:[Thanks,多謝你今日陪我.]
之後佢係我面上鍚咗一啖

我慢慢行返屋企,
一路諗,佢做乜鍚我?
Leo你唔好亂諗嘢啦,人地有男朋友架,又係嘅,人地鬼妹性格.
我自己諗多咗啫,不過.......

自從嗰日我煮咗餐飯比Anna姐食開始,我覺得佢對我有啲變咗,
平日佢對人係好重戒心,特別係男人,所以無男人埋到佢身.
現在佢多咗好多嘢同我講,好多時我地都會一齊出去食lunch,佢又會行過嚟同我傾計,公司班PKMON都話佢心情好靚.

呢排開始多嘢做,因為個event越嚟越近,我就越嚟越多嘢做,有時做到好夜先收工,因為咁亞May姐就比左條key我,叫我如果最後走就鎖門.

所以呢排好時都會同Anna姐一齊收工,佢真係好勁,一個人做咁多嘢,佢經常都朝9晚11,佢好似唔需要娛樂咁,有時我都會問佢,你唔悶咩成日都做嘢,佢話佢鍾意喎,其實我覺得佢係想用工作麻醉自己,等自己唔洗想美國個男友呱,唉~~異地戀真痛苦.

今日返工時已經聽到天文台話會打風,睇個勢應該打唔成,一日有李氏力場,一日都唔洗諗啦.
一路開工都無點睇個風,去到六點左右時先知會打八號,挑,收工先掛有Q用咩.

咁無理啦,反正最後一班船有排都未開,呢到行過去都唔洗十五分鐘,見啲同事都走得八八九九,咁入返房做自己嘢啦,啫係B嘢呀睇下片咁,有排未夠鐘.
到差唔多時間就走人啦,行過去Anna姐間房叫埋佢走,佢好似唔知八號咁,
等埋佢我地就一齊走.

點知搭搭下lift突然間一黑跟住停咗,嗱,唔好玩嘢呀要趕船呀.

保安:[喂,係唔係有人入面呀.]

我:[係呀.]

保安:[你地等一等,好快有人嚟架啦.]

我:[哦.]

Anna姐:[唔知要等耐?]

我:[唔會好耐呱]

我:[你有無試過八號風球坐船呀?]

Anna姐:[無.]

我:[咁要試嚇啦,好難得嘅體驗呢架.]

Anna姐:[你講到好似好恐怖咁喎.]

我:[無嘢嘅,玩一個鐘海盜船之嗎.]

佢笑笑口講:[未驚過]

我地由原本企係度等,結果等到坐咗係lift度.
可能因為打風行雷打中發電站,所以好地方都有人困lift,
到有人整返已經係20分鐘之後嘅事.

出到去門口,見真係橫風橫雨,唔講得少,
再睇下錶,

我:[@@,得返10分鐘,快啲跑啦,唔係趕唔到架]

但係Anna姐著住高踭鞋,點跑.
佢跑幾步已經唔得,

Anna姐:[你等我一陣.]
佢跟住除咗對高踭鞋赤腳跑
因為真係大風大雨,有天橋都無用

我跟住一手拖實佢喪跑去碼頭
結果都係趕唔到送船尾.

Anna姐:[咁點呀]

佢望住我,我又望住佢,大家都成身濕曬,見到對方落湯雞個樣都忍唔住大笑.

我:[返公司先啦,我地咁樣搭東湧線未去到東湧已經病左,就算去到東湧都未必有車去梅窩.]

去到公司樓下係7仔買咗啲嘢食,因為我同佢都未食飯,好鬼肚餓.
返到公司成身由頭濕到尾,真係底褲都濕埋.

我問佢
我:[你有無衫換呀]

Anna姐:[無呀]

Anna姐:[你呢?]

我:[等我一陣]
我返房攞咗件風褸比佢

Anna姐:[咁你呢]

我:[我除咗件面衫放係server房,好快就乾架啦]

我:[嗰幾部機啲熱力唔係講笑架]

我:[你換咗啲面衫比我,我同你攞入去吹返乾佢先,你著住我件風褸先啦.]

咁佢入左自己房換衫,佢攞咗啲濕到可以摟出水嘅衫喺門隙攞比我

我攞住佢啲衫去server房,掛好啲衫同裙.

返到去佢房門口,我就坐咗喺出面地下,聽聲佢應該係背對我坐

我:[開餐?]

Anna姐:[好呀]

我:[嗱,杯麵呢家嘢你問我啦,滿漢大餐真係杯麵中嘅XO呢架.]
我用熱水整好兩個麵,喺門隙攞比佢.

我:[好唔好食呀]

Anna姐:[唔,幾好食]

Anna姐:[Leo]

我:[乜事?]

Anna姐:[你有無理想架?]

我:[唔洗返工日日係屋企打機嗰隻?]

Anna姐:[唔係呀]

Anna姐:[有無啲嘢好想做又未做]

我細細聲講:[破處囉]

Anna姐:[嚇!咩丫]
我:[唔講得架喎]

Anna姐:[咁講得嗰啲呢]

我:[出去睇下呢個世界.]

Anna姐:[你咁後生可以架.]

我:[你好老咩?]

Anna姐:[幾啦,女人到咗40就要放棄好多嘢]

我:[你40??睇樣唔似喎,我以為你三十幾]

Anna姐:[我係唔係保養得唔錯呢]

我:[嚇!咩呀,啱啱耳嗚聽唔到添]

Anna姐:[唉~~,公司生意又唔好,好似話要裁員,IT部又好似無乜嘢做咁...]

我:[呀!!你剛才話要放棄乜話?]

Anna姐:[愛情同事業2選1呀]

我:[你唔係已經有咗決定咩?]
佢無答我.

我:[咁你呢?]

Anna姐:[我乜呀?]

我:[理想呀]

Anna姐:[以前咪同你一樣,希望去睇下呢個世界]

我:[咁現在呢?]

佢沈默咗好耐,之後答我
Anna姐:[唔知,唔夠膽諗.]

我:[睇呢你有好多枷鎖喺身.]
Anna姐:[你又知?]

我:[你連一個小學生都識答嘅問題都要諗,正常女人咪答,想拍拖,結婚,生仔,嫁個有錢人,
你是但答啲嘢都好丫,但係你偏偏答我唔夠膽諗,你知唔知呢個唔係一個答案,呢個係一個鎖,一個令你唔可以想,唔可以做嘅鎖.]

佢又再沈默
我:[你同你男友又嘈交呀]

佢停咗幾秒
Anna姐:[唔係]
每次一講到佢男友跟著佢又轉話題

Anna姐:[咁你想去邊呀]

我:[唔知呀只係想去其他國家玩下睇下女仔咁囉]

Anna姐:[成日都係諗女人,你都幾鹹濕喎]

我:[男人係咁架啦]

Anna姐:[咁你又唔搵女朋友]

我:[我咁樣又宅搵鬼到女朋友咩]

Anna姐:[唔係呀,我都覺得你唔喺咁差啫,你幾細心又幾溫柔呀,]

Anna姐:[你鍾意啲咩嘢類型女仔架?]

我:[我呀?成熟,有主見,唔鍾意細路女,佢地真係好煩,好似你咁就最好啦.]

我:[我...講嚇架咋,你...你唔好誤會呀.]
我聽到佢喺度笑.

我:[係呢,今晚你諗住點呀？]

Anna姐:[喺到訓]

我:[咁我喺出面訓]

Anna姐:[你可唔可以行開一陣,我想去洗手間]
佢雖然有我件風褸,不過佢無咗條裙,係有啲尷尬.
我:[Ok咁我入房睇下啲衫點先]

我係房等咗十幾分鐘,覺得有啲唔對路,行出去睇下,唔見人

諗住入返房等啦,突然聽到大門口有啲聲,咁行過去睇下

見到Anna姐企咗喺門口,我知點解啦,佢啲 keycard喺曬啲衫到,變咗出咗去入唔返.

我企咗喺到真係睇到眼都定曬.

佢本身唔係高頭大馬型,所以我件風褸佢著基本上係變咗件一件頭,啱啱好遮到個PATPAT
不過望見佢對腳真係靚到呢,又白又滑,啲曲線真係完美.

佢忍唔住叩塊玻璃門我先醒起要幫佢開門.
佢一入嚟就話我

Anna姐:[鹹濕佬]
跟住行過打咗我一嘢

我:[罪過,罪過]

佢行返入房之後喺門口問
Anna姐:[你訓出面怕唔怕凍?]

我:[唔怕]
講真就算唔開冷氣,喺咁環境唔變肺炎已經好好彩.

Anna姐:[我房入面有兩張梳化,你可以訓一邊]

我陰陰咀咁笑
我:[你唔驚咩,啱啱先話我鹹濕hehehe~~]

佢輕輕拍咗我塊面一下
Anna姐:[我都好想試下我啲跆拳道有無生疏到]

就係咁,我喺出面搵咗幾個,佢地平時用嚟坐嘅咕臣入房比Anna姐用
我地L字型咁訓,我貼門口,佢貼牆.

臨訓前要同我講.
Anna姐:[嗱!唔好亂諗嘢呀,早抖]
佢背對住我訓,我偷偷望住佢個背影,約隱約現嘅底褲,修長美腿.
你叫我點訓呀小姐.
終於到天光,佢都訓醒咗.

Anna姐:[早晨]

我:[早晨]

Anna姐:[訓得好唔好呀]

我:[OK]
其實成晚無訓過,點訓得到呀,終於明白有得睇無得食嗰種痛苦.

我:[好似停咗風啦]

我:[我去攞返啲衫先]

攞咗啲衫比佢換之後,我地就出去食個早餐之後搭船返梅窩.

由於今日係星期六又打完風所以無咩人入去,架船好少人

其實尋晚大家都訓得唔好所以喺船都好攰,佢一邊挨喺我膊頭訓著咗,

突然間我覺得自己好幸福,如果有個咁好嘅女人喺我身邊你話幾好呢,雖然呢個係一個夢,我想呢程船唔好咁快到.
可惜美好嘅嘢永遠都係短暫,好快就到啦,唔想叫醒佢,但係又唔得.

我:[Anna姐到啦.]

佢醒咗,可能知自己挨喺我膊頭訓著咗有啲唔好意思.

我:[放心喎,你無流口水落我膊頭.]

佢笑住細細力打咗我一嘢

我:[嘩,你成日郁手打人架.]

Anna姐:[女人係咁架啦]

我:[暴力女高層呀,唔知平機會受唔受理.]

Anna姐:[你去愛護動物協會可能會受理架]
佢做咗一個插我眼嘅手勢.                                    

到咗碼頭,我送佢返屋企.

送到門口,佢望住我,我又望住佢,
大家都好似欲言又止咁,

Anna姐:[咁...BYEBYE]

我:[咁...BYE]

行咗兩步我忍唔住問:[你今晚有無約人呀?]
Anna姐:[無呀,做乜呀?]
我:[不如我今晚過去你呢邊煮飯比你食.]
Anna姐耷低頭微微咀咁笑咗一笑:[好呀,你鍾意.]
我:[咁我買餸.]
Anna姐:[唔.]
我:[一陣見.]
Anna姐:[一陣見.]

呢排成日都會諗起嗰日打風見到Anna姐個畫面,係,我係一個鹹濕仔,我認.

朝早返工有樣嘢係幾攞命,就係等lift,
Lift多,返工嘅人更多,有時等成幾部先入到,如果趕時間就PK啦.

今朝又係同平日一樣係度等lift時,咁我一邊打機,一邊等.
等等嚇,睇見我前面個女仔同我一樣打緊同一隻GAME,
大家都係到玩緊{天堂II}
打機友通常都有一個共通點,就係鍾意八卦嚇人地乜嘢Lv,
如果玩呢類MMORPG就會睇嚇人用咩嘢裝備.

咁我喺度望嚇.一睇,忍唔住叫咗出呢

我:[嘩,全套稀有裝!!]

個女仔一聽到我咁講,望一望我,

個樣都OK喎,短頭髮,幾cute嗰啲樣.

女:[係呀.]

我:[睇呢你都課咗唔少喎]

女:[咩課金呀,我自己抽返呢架,]

我:[有無咁神運氣呀?]

我:[我由第一日開GAME玩到現在我都係得一件稀有裝備咋.]

女:[我一向打機都唔課金嘅,係啲傻仔先會課金.]

比佢咁講,好似俾人打咗一巴咁.
係,我打機有課金,不過.....我覺得課金唔係好傻啫.
我忍唔住還擊.

我:[無人課金你又邊有免費GAME玩.]

女:[弱者嘅行為.]

我聽到有啲火.

正想再還擊時,lift到.

因為多人,所以只好入lift.
入到lift,個女仔企係我側邊,

我又忍唔住講,
我:[你都好有自信喎,不過MMORPG就講裝啫,槍GAME,格鬥GAME就講實力.]

女:[我打槍GAME都唔差架喎.]

我開始感覺到好濃烈嘅挑機味,正當我想再講嘢時.

女:[我到啦.唔該借過.]

我望一望,
我:[我都係呢層喎.]

我地出咗lift之後,啤咗對方一嚇.

大家同一時間講,
我:[留低你個ps4 game tag比我]
女:[留低你個ps4 game tag比我]

女:[驚你呀,]

我地用電話留咗對方個game tag

女:[我行呢邊,宅!!]
佢特登將最尾個字大聲講.

我:[咁我行嗰邊,我去廁所,腐!!]
我都唔示弱最尾個字我都大聲講
真係火起,一早就比人挑機.

返到公司,同啲同事打聲招呼咁我入房又開工,呢排要更新server入面啲data,又有排做.

做做嚇嘢Anna姐行過,

Anna姐:[Hi]

我:[早呀,今朝搭船唔見你?]

Anna姐:[係呀,一早約咗個客食早餐,所以今朝好早就出咗嚟.]

我:[原來如此.]
我:[如果今朝早同你一齊就唔洗比個八婆激到著火.]

Anna姐:[咩八婆?]

我:[唉~~唔好提,比人挑機.]
佢笑咗一笑無理我.

Anna姐:[今日一齊lunch?]

我:[好呀.]

正當Anna姐準備行返去自己房時,

May姐行過
May姐:[呢位係我地亞Head Anna姐]

May姐:[佢係人事部新同事Asuka,今日第一日返工.]

Asuka:[早晨  Anna姐,]

Anna姐:[Hi Asuka,]

May姐:[呢間係IT部]

May姐:[佢係公司嘅IT人佢叫..]

Asuka:[宅!!]

一聽呢把聲,挑機!!
我擰轉頭一睇:[腐!!]

Asuka:[啲宅硬係鍾意做IT.]

我:[人事部都唔知點請人咁串點同人溝通.]

Anna姐:[你地兩個識架?]

Asuka:[唔識!!]
我:[唔識!!]
今日乜日子,黑成咁,朝早比人串,
係公司又撞正,串完一嘢又一嘢,激氣.


一路入data,攪到都唔知幾點.
見May姐同隻{腐}行過,
我當然係唔會理佢啦,繼續做我嘅嘢,
May姐行過呢叫我

May姐:[Leo,我地今日個個都帶飯呀,你一陣不如同Asuka一齊食飯呀,]

Asuka:[嚇!同佢!?]

我:[嚇,唔得喎我約咗人呀]

Asuka:[係咁架啦,啲宅最鍾意無人約扮有人約架.]

我:[咩呀!!]

正當我想發火時,
電話響,

我:[嗱,唔知邊個話無人約話?]

我:[喂!]
係Anna姐

Anna姐:[Leo唔好意思呀,我有個電話要講唔知要講幾耐,不如你自己食先,
順便返嚟時幫我買份三文治呀,唔該.]

我:[咁,咁好啦,我自己食啦.]

Asuka:[丫,比人放飛機喎,]

我:[我自己食都唔同你食.]

May姐:[人地新同事做乜唔同人食?]

我:[因為佢....]

May姐:[你係唔係男人嚟架,叫你去呀!!]

比May姐咁丙咗一嘢.

我:[OK,咁我帶佢去食Lunch!]

Asuka:[驚你呀!宅!]

中環lunch time一如以往咁難搵食,
咁無選擇情況之下最方便就係M記.
佢又唔係Anna姐,唔洗同佢食好嘢喎.

搵個位坐低咗,我去買嘢.

買完返嚟佢無出聲自己喺度食,我忍唔住發火.

我:[喂,你有無禮貌架,幫埋你買唔該都無聲.]

佢啤一啤我.
Asuka:[唔該喎.]

我諗住佢唔會講唔該我就可以繼續鬧架嗎,
佢一講,我又唔知可以講乜.

我地坐低各自食,大家都望住部手機無出聲,各有各玩.
我喺度打{白貓}
我:[@@,有無咁硬呀,完全打唔入隻皇]

Asuka啤一啤我:[廢!!]

我:[你咁勁,你過比我睇.]

佢真係攞咗我部手機.

Asuka:[學嘢啦,睇我點打]

結果...我無嘢好講,真係比佢打贏咗隻皇.

Asuka:[服未?]

我:[我....未服,]

Asuka:[我打機好勁架]

我:[丫,靚妹,你真係好串嚇喎.]

Asuka:[我串得起.]
我真係無曬嘢好講,從未撞過啲咁嘅人.

我:[夠鍾啦,走人.]

忽然間醒起
@@,唔記得幫Anna姐買三文治.

咁我嗱嗱啉去買份三文治.
返到去見Anna姐仲講緊電話,咁我放低份三文治係佢檯面.
佢對住我笑一笑,咁我就出返去做嘢.

望住幾吋厚嘅data真係唔知幾時先入完.
做到差唔多收工,隻{腐}行嚟,

Asuka:[宅!!R6見]

我:[挑機!!]

我:[我接受你挑機,R6見.]

Asuka:[輸咗點先?]

我:[我以後見到你都叫你做Asuka姐]

我:[如果你輸呢?]

Asuka:[我以後唔叫你宅!!]

我:[好,一言為定!]

收工同Anna姐一齊坐船返梅窩

Anna姐問我:[點呀,聽May姐講今日個新靚女同時陪你食飯喎?]

我:[唉~~唔好提]

Anna姐:[做乜?]

我:[人生從未試過咁大挫敗感.]

Anna姐:[你唔係第一日就去追人呀.]

我:[我似啲咁嘅人咩?]

Anna姐:[鹹濕佬好難講架,人地又後生又靚女.]

我:[我鍾意同你食飯多啲囉.]

Anna姐笑一笑.

我:[今晚我就要好好教訓嚇佢.]

Anna姐:[今晚?你約咗佢呀?仲話唔係追人?]

我:[唔係呀,打online game咋.]

Anna姐:[哦,嚇得我,我以為你真係追人]

我:[嚇咩呀,你剛才講乜我啱啱諗緊嘢聽唔到?]

Anna姐:[嚇!無嘢呀]

每日最興奮都係可以同Anna姐同船返工雖然無特登約埋,但係大家都係差唔多時間,
好難唔一齊,朝朝都見到個靚女點會唔開心.

今日當然都係同佢一齊啦,因為班次時間,所以多數我同佢都係最早返工嗰個.
但係今日有啲例外.
有人早過我同Anna姐,係隻{腐}

我地三個企咗係公司開口,

Anna姐:[早晨]

Asuka:[Anna姐早晨]

我諗住去開門,忽然俾人阻住.

Asuka:[仲唔叫人?]

我啤一啤佢,
佢啤實我.

Asuka:[快啲啦.]

Anna姐:[咩事呀?]

我:[早晨~~~Asuka姐]

Anna姐:[嚇!]

Asuka:[唔,乖~~宅!!]

Asuka:[開門啦.]

Anna姐見到咁唔知俾乜反應好.

睇到呢度我諗唔洗我講你都知尋晚戰果係點啦.
唉~~失敗,打咁耐機都未試過一晚入面死咁多次.

Asuka:[Anna姐你先啦.]

Anna姐:[哦.]

Asuka指住我:[你最後.]
佢之後返埋佢個位.

Anna姐望實我,
Anna姐:[你地做乜呀.]

我:[唉~~連最後尊嚴都輸埋囉.]

佢笑一笑,
Anna姐:[咁你以後要叫佢Asuka姐?]

我:[唉~~~我入房做嘢先.]

一個男人輸曬所有尊嚴,真係自己都覺得好鬼無用.

就係咁我每日見到Auska,都要叫佢Auska姐.

佢都已經做咗半個月有多,我多數都係同佢一齊食,佢話唔鍾意帶飯喎.
咁呢排Anna姐又好鬼忙無同我食lunch,次次都係叫我幫佢買三文治就算.

原本唔想同Asuka食,不過唉~~算啦,男人老狗唔好咁小氣.
識耐咗其實佢份人都OK架,可能都鍾意打機,都幾多話題講,不過係公主病少少.

Lunch Asuka又走過呢叫我

Asuka:[宅!!食飯呀.]

我望一望佢,原本諗住今日搵Anna姐食,好似好耐無同佢食飯,不過佢出咗去開會,咁.....

我:[哦,好.]

食lunch時我問佢.

我:[你打咗好耐機架?]

Asuka:[一年多啲]

我:[嚇!!天才!]

Asuka:[係鬼,以前條仔鍾意打機咪成日同佢一齊打囉.]

我:[IC,原來陪男友打機,咁係唔係打機勁得濟所以條仔走咗.]

Asuka:[你把口都幾乞人僧架喎.]

我:[Sorry囉]

Asuka:[佢識咗第二條女咪飛咗我囉.]

Asuka:[佢走寶啦,我咁正佢都唔要.]

我:[你真係幾有自信嚇喎]

Asuka:[如果連我咁樣都無自信咁其他女人咪要排隊跳樓.]

我:[口味嘅嘢好難講嘅,你覺得正,可能佢覺得垃圾呢]

Asuka:[你講咩呀,咩垃圾呀,睇你都未拍過拖啦,死宅!!]

我...我又俾人打中死穴.
唔怪之得佢男友唔要佢啦,超級公主病,點解我識親啲女人都咁惡架,

Asuka:[做咩呀,唔出聲俾我講中呀?]

我:[唔.係.呀.得未.]

Asuka:[喂,點解你朝朝都同Anna姐一齊返工?]

我:[我地都係住梅窩,搭同一班船,所以咪成日一齊返囉]

Asuka:[梅窩仲有人住咩?我好似小學入過去,之後都無再去過]

我:[係呀,梅窩仲有人住架,外星人.]

Asuka:[我見你兩個成日一齊以為你兩個係情侶.]

我一聽到佢呢句連飲緊嘅可樂都噴埋出嚟.

我:[你...唔好,亂講呀.]

我:[俾Anna姐聽到就唔好啦,人地係美國有男朋友架.]

Asuka:[人地有男友你就唔好成日同人一齊出出入入啦,除非你想.....]

我:[我想咩?]

佢一手指住我:[你想撬人牆腳囉.]

我:[嗱,雖然我唔介意俾人屈,但係真係唔好亂講嘢,]
Asuka:[或者佢都唔介意呢]

我:[嗱!!唔好屈Anna姐呀]

Asuka:[我作為一個女人,如果對一個人無好感,係絕對唔會日日同佢一齊行架.]

我:[咁你又同我日日lunch?]

Asuka:[其他人一睇就知係你呢隻癩蝦蟆想食我呢件天鵝肉啦]

我:[發神經,燒鵝肉就有你份.]

Asuka:[不過諗諗嚇都係無可能]

我:[又乜呀]

Asuka:[Anna姐咁高質素,無理由會睇得上你呢啲....嚇]
佢上下咁打量我一嘢.

我:[我呢啲咩呀?]

Asuka:[呵!呵!呵!自己諗].

我:[嘩,你真係好攞命,我認輸,我投降,我頂唔順,救命呀.]

Asuka:[搵日我同Anna姐食飯八掛嚇先]

我:[嗱,你唔好亂嚟呀,]

Asuka:[我要做,你阻到我?]

我:[我....]

雖然Asuka真係串到爆,但係諗深一層佢講啲嘢又好似有啲道理.

今日收工Anna姐又真係等埋我先一齊走喎.

搭船時Anna姐問我:[呢排你成日同Asuka一齊食lunch?]

我:[係呀]

Anna姐:[見你同佢都好玩得埋咁.]

我:[可能都鍾意打機呱.]
Anna姐:[你...覺得佢點呀?]

我:[OK啦,係公主病少少.]

講講嚇Asuka打電話呢

我:[喂,現在?好呀]

Anna姐:[邊個?]

我:[Asuka搵我打機.]

Anna姐:[佢都幾靚女丫]

我:[唔]

Anna姐:[你無興趣咩?]

我:[唔]

Anna姐:[你想追人就認真啲啦]

我:[唔]
我一邊同Asuka打機一邊聽Anna姐講嘢.
可能太專心打機,佢又講得好細聲,佢似自言自語多啲,所以唔係好聽到Anna姐講乜.

Anna姐:[你地年紀又差唔多都幾襯丫,又啱傾,佢又靚,又...後生過我...]

我:[嚇咩呀?]

Anna姐:[你有無聽我講嘢架?]

我:[我....]

Anna姐:[算啦,無嘢啦,唔講啦.]
Anna姐黑口黑面,塞實對earphone無再理我.

剛才佢講乜呀,我真係聽唔到丫嗎.

每日最興奮都係可以同Anna姐同船返工雖然無特登約埋,但係大家都係差唔多時間,
好難唔一齊,朝朝都見到個靚女點會唔開心.

今日當然都係同佢一齊啦,因為班次時間,所以多數我同佢都係最早返工嗰個.
但係今日有啲例外.
有人早過我同Anna姐,係隻{腐}

我地三個企咗係公司開口,

Anna姐:[早晨]

Asuka:[Anna姐早晨]

我諗住去開門,忽然俾人阻住.

Asuka:[仲唔叫人?]

我啤一啤佢,
佢啤實我.

Asuka:[快啲啦.]

Anna姐:[咩事呀?]

我:[早晨~~~Asuka姐]

Anna姐:[嚇!]

Asuka:[唔,乖~~宅!!]

Asuka:[開門啦.]

Anna姐見到咁唔知俾乜反應好.

睇到呢度我諗唔洗我講你都知尋晚戰果係點啦.
唉~~失敗,打咁耐機都未試過一晚入面死咁多次.

Asuka:[Anna姐你先啦.]

Anna姐:[哦.]

Asuka指住我:[你最後.]
佢之後返埋佢個位.

Anna姐望實我,
Anna姐:[你地做乜呀.]

我:[唉~~連最後尊嚴都輸埋囉.]

佢笑一笑,
Anna姐:[咁你以後要叫佢Asuka姐?]

我:[唉~~~我入房做嘢先.]

一個男人輸曬所有尊嚴,真係自己都覺得好鬼無用.

就係咁我每日見到Auska,都要叫佢Auska姐.

佢都已經做咗半個月有多,我多數都係同佢一齊食,佢話唔鍾意帶飯喎.
咁呢排Anna姐又好鬼忙無同我食lunch,次次都係叫我幫佢買三文治就算.

原本唔想同Asuka食,不過唉~~算啦,男人老狗唔好咁小氣.
識耐咗其實佢份人都OK架,可能都鍾意打機,都幾多話題講,不過係公主病少少.

Lunch Asuka又走過呢叫我

Asuka:[宅!!食飯呀.]

我望一望佢,原本諗住今日搵Anna姐食,好似好耐無同佢食飯,不過佢出咗去開會,咁.....

我:[哦,好.]

食lunch時我問佢.

我:[你打咗好耐機架?]

Asuka:[一年多啲]

我:[嚇!!天才!]

Asuka:[係鬼,以前條仔鍾意打機咪成日同佢一齊打囉.]

我:[IC,原來陪男友打機,咁係唔係打機勁得濟所以條仔走咗.]

Asuka:[你把口都幾乞人僧架喎.]

我:[Sorry囉]

Asuka:[佢識咗第二條女咪飛咗我囉.]

Asuka:[佢走寶啦,我咁正佢都唔要.]

我:[你真係幾有自信嚇喎]

Asuka:[如果連我咁樣都無自信咁其他女人咪要排隊跳樓.]

我:[口味嘅嘢好難講嘅,你覺得正,可能佢覺得垃圾呢]

Asuka:[你講咩呀,咩垃圾呀,睇你都未拍過拖啦,死宅!!]

我...我又俾人打中死穴.
唔怪之得佢男友唔要佢啦,超級公主病,點解我識親啲女人都咁惡架,

Asuka:[做咩呀,唔出聲俾我講中呀?]

我:[唔.係.呀.得未.]

Asuka:[喂,點解你朝朝都同Anna姐一齊返工?]

我:[我地都係住梅窩,搭同一班船,所以咪成日一齊返囉]

Asuka:[梅窩仲有人住咩?我好似小學入過去,之後都無再去過]

我:[係呀,梅窩仲有人住架,外星人.]

Asuka:[我見你兩個成日一齊以為你兩個係情侶.]

我一聽到佢呢句連飲緊嘅可樂都噴埋出嚟.

我:[你...唔好,亂講呀.]

我:[俾Anna姐聽到就唔好啦,人地係美國有男朋友架.]

Asuka:[人地有男友你就唔好成日同人一齊出出入入啦,除非你想.....]

我:[我想咩?]

佢一手指住我:[你想撬人牆腳囉.]

我:[嗱,雖然我唔介意俾人屈,但係真係唔好亂講嘢,]
Asuka:[或者佢都唔介意呢]

我:[嗱!!唔好屈Anna姐呀]

Asuka:[我作為一個女人,如果對一個人無好感,係絕對唔會日日同佢一齊行架.]

我:[咁你又同我日日lunch?]

Asuka:[其他人一睇就知係你呢隻癩蝦蟆想食我呢件天鵝肉啦]

我:[發神經,燒鵝肉就有你份.]

Asuka:[不過諗諗嚇都係無可能]

我:[又乜呀]

Asuka:[Anna姐咁高質素,無理由會睇得上你呢啲....嚇]
佢上下咁打量我一嘢.

我:[我呢啲咩呀?]

Asuka:[呵!呵!呵!自己諗].

我:[嘩,你真係好攞命,我認輸,我投降,我頂唔順,救命呀.]

Asuka:[搵日我同Anna姐食飯八掛嚇先]

我:[嗱,你唔好亂嚟呀,]

Asuka:[我要做,你阻到我?]

我:[我....]

雖然Asuka真係串到爆,但係諗深一層佢講啲嘢又好似有啲道理.

今日收工Anna姐又真係等埋我先一齊走喎.

搭船時Anna姐問我:[呢排你成日同Asuka一齊食lunch?]

我:[係呀]

Anna姐:[見你同佢都好玩得埋咁.]

我:[可能都鍾意打機呱.]
Anna姐:[你...覺得佢點呀?]

我:[OK啦,係公主病少少.]

講講嚇Asuka打電話呢

我:[喂,現在?好呀]

Anna姐:[邊個?]

我:[Asuka搵我打機.]

Anna姐:[佢都幾靚女丫]

我:[唔]

Anna姐:[你無興趣咩?]

我:[唔]

Anna姐:[你想追人就認真啲啦]

我:[唔]
我一邊同Asuka打機一邊聽Anna姐講嘢.
可能太專心打機,佢又講得好細聲,佢似自言自語多啲,所以唔係好聽到Anna姐講乜.

Anna姐:[你地年紀又差唔多都幾襯丫,又啱傾,佢又靚,又...後生過我...]

我:[嚇咩呀?]

Anna姐:[你有無聽我講嘢架?]

我:[我....]

Anna姐:[算啦,無嘢啦,唔講啦.]
Anna姐黑口黑面,塞實對earphone無再理我.

剛才佢講乜呀,我真係聽唔到丫嗎.

由嗰日開始,Anna姐又開始對我冷淡同黑面,
唔會係因為聽唔到佢講啲嘢呱?好緊要嘅嘢呢咩?

喺船佢又無乜點理我,係公司佢都係一樣,唔係呀,又激嬲咗佢?死啦今次連衰乜都唔知喎.

返到公司,做做嚇嘢Asuka又走過呢同我吹水,佢一得閑就會走過呢搵我吹水,有時我都驚俾Anna姐見到.
其實今日我無乜點應佢,自己心情都麻麻地.

突然間我聽到有人好大聲叫我個名.

Anna姐:[Leo!!]

我嗱嗱啉走過去:[咩事呀?]

Anna姐:[點解啲價錢仲未update架?唔係已經叫你更新data咩?]

我:[我有呀?]

Anna姐:[咁點解我手上呢份仲係舊架?]

我:[我望一望佢手上份嘢]

Anna姐:[我現在要呀,NOW!!]

跟住佢就入返房,好大力閂門.
全世界都望實我,

連May姐都走過嚟問我

May姐:[Leo,你做過啲乜嘢嚟,激到Anna姐咁慶呀?]

May姐:[我跟咗Anna姐咁耐都未見過佢發咁大脾氣.]

我:[我唔知呀]

May姐:[快啲攪返好啲資料先啦.]

咁我立即入房整過份新資料俾Anna姐啦.

整好之後戰戰兢兢咁攞俾Anna姐
入到佢房佢望都無望我一眼,
Anna姐:[放低.]

我:[哦.]

睇呢佢仲係好慶.

咁我只好死狗咁行出去啦.
Lunch時我行去問Anna姐

我:[Anna姐,洗唔洗幫你買三文治.]

Anna姐:[唔洗,我叫咗其他人幫我買.]

我:[哦,咁...我出去先.]

我:[唉~~]

正當我心煩緊時,

Asuka陰陰咀咁笑住行過呢.

我:[又乜呀,嗱我真係無心情呀.]

Asuka:[想唔想聽嚇專家拆解?]

我:[邊個專家?]

佢用手指指實佢自己

我:[妖~~都話無心情玩囉]

Asuka:[咁你唔信我,你都要食飯架,一邊食一邊講啦]

食飯時我問Asuka
我:[點呀專家有乜高見呀?]

Asuka:[無]

我:[咁你又話自己係專家]

Asuka:[咁你都未清楚講俾我知你地乜嘢關係.]

我:[乜嘢關係?咪同事囉.]

Asuka:[OK,咁同事都有好多種架,我同Anna姐都係同事,又唔見佢咁對我.]

我:[咁我地係比較close,因為我地都係一個人住係梅窩,又成日見.]

Asuka:[係得咁多?]

我:[咁我地都會講嚇心事嘅.]

Asuka:[好深入?]

我:[幾啦,起碼全公司得我一個知佢有男朋友.]

Asuka:[唔..我就入咗呢唔夠一個月,但係我都睇得出Anna姐係一個好難接近嘅人,]

Asuka:[佢係嗰種靚到你唔夠膽行埋去身邊,而且佢幾自我封閉]

我:[係呀.]

Asuka:[咁有無發覺你係例外架?]

我:[咁啫係點呀,唔明喎.]

佢又係到陰陰咀笑,

Asuka:[遲啲你咪知囉.]

我:[嚇!!]

我:[你咁叫幫咗我架嗱?]

佢又唔出聲.

頂,我真係俾佢玩死

食完飯返到公司,
由於俾Anna姐鬧完,所以盡快更新曬啲資料,如果唔係又出事.
一做我又唔知幾多點.

突然收到個whatsapp,係Asuka

我睇嚇佢講咩?

一睇成個人彈咗起身.
Asuka話搵Anna姐傾嚇
我衝出去Anna姐房,佢原來已經走咗.

我即刻whatsapp Asuka問佢係邊?

Asuka話係碼頭

咁我即刻狗衝去碼頭,阻止Asuka亂嚟

Asuka:[Hi Anna姐]

Anna姐:[Asuka?咁啱你又係到?]

Asuka:[我等人]

Anna姐:[你...等Leo?]

Asuka:[唔係呀,我等你.]

Anna姐:[嚇,做乜等我?]

Asuka:[無,其實可能係我多事啦,不過有啲嘢睇唔過眼想出聲啫,你唔好怪我,我份人比較直]

Anna姐:[你係因為我今日鬧Leo,覺得我唔啱所以幫佢出聲?]

Asuka:[唔係喎,佢做錯嘢抵俾人鬧.]

Anna姐:[咁你搵我係因為乜嘢事?]

Asuka:[其實我得五分鐘時間同你講嘢,所以我長話短說.]

Anna姐:[點解得五分鐘?]

Asuka:[因為五分鐘之後個白癡就會衝過嚟同你講唔好聽我亂講.]


Asuka:[可能佢自己都唔知道已經鍾意咗你,但係我睇佢反應就知,]

Asuka:[你都係]

Anna姐:[嚇我?你唔好講笑啦,我點會鍾意佢呀]

Asuka:[我聽Leo講,你係美國有個男朋友,雖然我唔知你同男朋友關係喺點,]

Asuka:[但係有一樣嘢我可以好肯定,你同Leo關係一定俾你男朋友好.]

Anna姐:[點解咁講?]

Asuka:[你自己可能唔知,你對佢完全無戒心,呢樣唔係普通朋友可以有嘅信任.]

Asuka:[你好緊張Leo,我一話喺度等人,你第一個諗起嘅係Leo,你見佢同我玩得埋,就開始好不安.]

Anna姐:[我無]

Asuka:[有!你.吃.醋.]                                                               

Anna姐:[我做乜事會吃醋?]

Asuka:[我讀心理學架,我唔洗用測謊機都知邊個講真話邊個講大話,每個人嘅行為都會反映出佢當時喺到諗乜.]

Asuka:[你由我同你講嘢開始你望咗錶四次,咁就証明你好不安,好緊張.]

Asuka:[唔係講中做乜會咁緊張.]

Asuka:[以我平日觀測,我知你唔會理其他人點睇,你係擔心Leo受唔到呢方面壓力?你怕佢受傷?所以先咁多顧慮,其實洗乜理咁多嘢]

Asuka:[今時今日,最緊要係珍惜眼前人,活在當下,將來嘅事邊個知?]
Anna姐靜咗無出聲.

Anna姐:[唔係你睇得咁簡單,我同佢....]

Asuka:[錯丫嗎!感情邊有分對同錯架,其他人點睇重要咩?自己點睇先係最重要.]

Asuka:[如果連自己嘅感覺都唔信,咁仲有乜嘢值得信?]

Asuka:[如果有一日真係出現你唔想見到嘅情況,咪到時先再決定點做囉.]

Asuka:[當俾個機會俾大家唔好咩?我睇見你兩個咁覺得你地辛苦乍.]

Asuka:[你係聰明人,你明我講咩嘅.]

Anna姐:[我明你意思.]

Asuka:[明就好啦]

Asuka:[接唔接受佢你自己決定.]

Asuka:[應該差唔多個白癡係我背後出現,我聽到腳步聲,你睇嚇佢幾緊張你,如果我條仔好似佢咁我一定開心死]

Asuka:[其實我好羨慕你,有個咁錫自己嘅人,如果你真係放棄Leo,我會搶走佢.]
由我表明來意開始Anna姐一直都迴避同我有目光接觸,直至我剛才一句說話,
佢望實我,佢知我唔係講笑

Asuka:[咁我走啦,Byebye]

我:[你.....你....你]
我喘曬氣幾乎訓低.

Asuka:[你遲咗啦,白~~~~癡!!Byebye]

我:[A....An...na..姐....唔.....唔...好聽....聽...佢.....亂...亂講...嘢.]

Anna姐:[你抖順條氣先講啦.]

我:[我......我.....無....事....佢...佢]

Anna姐:[得啦.]

我:[但...但...係...我]

Anna姐:[Shut up!]

我抖咗成五分鐘先講得返嘢

我:[Asuka頭先講咗咩呀?你唔好誤會呀,我其實.]

Anna姐:[我都話得囉,你聽唔到我講乜咩?]

Anna姐:[船到啦,上船啦.]

坐係船上面,我啲汗滴過不停,大佬,好日都唔做運動,突然間咁跑過嚟,唔死已經好好采,
Anna姐望住我都係黑口黑面.

我:[Sorry,我之前入錯data]

Anna姐:[唉~~唔知邊個成日掛住同人地玩,正經嘢又做錯曬呢]

我:[我...Sorry,我知啲data係入慢咗,我頭先差唔多更新曬,不過我真係唔係掛住同佢玩架.]

Anna姐:[咁點解咁慢丫?仲要入錯.]

我:[我...諗緊其他嘢.]

Anna姐:[諗乜呀?諗住點追人呀?]

我:[唔係呀,我對Asuka無興趣,我都話我唔鍾意靚妹囉]

我:[我諗緊你做乜又唔采我,係唔係因為我呢排成日同佢一齊?我同Asuka無嘢架]


我:[又唔知點開口同你講]

Anna姐微微咀偷笑:[關我乜嘢事呀,我又唔係你邊個]

我:[我知....總之我就唔想你誤會啦]

Anna姐:[我好嬲呀!因為你我俾人教訓呀!]
佢出盡力係咁打我,睇呢真係好嬲,側邊啲人見到又唔知乜嘢事,係咁望實我地.

我:[Sorry,我唔知Asuka會咁激連你都夠膽話.]

Anna姐:[佢點只教訓我,佢仲話要...]

Anna姐好大聲咁叫咗出呢:[激死我~~啦!!]
今次成船人望住我地.
死啦,今次真係唔知點收科,大鑊啦,
Asuka你又話幫我?你似害我多啲喎.

Anna姐:[冷靜~~,冷靜~~.]
見Anna姐合埋眼,深呼吸咗一陣

我:[Asuka講咗啲乜呀?]

Anna姐:[唔話你知]
又嚟呢套.

Anna姐望住我:[唔怪得之Asuka叫你白癡,你真係好鬼蠢.]

我:[嚇!!]
有無人可以話俾我知發生乜嘢事呀?

我望住佢個發嬲樣,佢又望住我.
我從未見過佢咁樣失控,忍唔住偷笑咗一下,

Anna姐:[笑咩呀.]
跟住又打咗我一嘢

Anna姐:[最衰都係你]
我諗佢自己都未試過咁樣發皮氣,佢都忍唔住偷笑咗.

我:[Sorry呀,我代佢向你道歉呀.]

Anna姐:[Say sorry就當無事呀,唔得呀]

Anna姐笑笑口講:[我肚饑呀,請食飯啦.]

我:[嚇!!糧尾喎,小姐]

Anna姐:[咁你請唔請丫]

我:[請.....7仔得唔得呀?]

Anna姐:[唔得,我要食海鮮]

我:[嚇,玩到咁大]

Anna姐:[丫,食乜好,椒鹽大蝦,豉汁炒聖子,蒜蓉粉絲蒸扇貝,好,就呢幾樣啦.]

我:[嘩~~今個月無錢買game啦]

Anna姐:[睇你都係想買game同Asuka一齊玩啦.]

我:[唔係!!當然唔係啦,咁就一於食盡佢,都好耐無同你一齊食飯]

Anna姐:[咁多謝喎]
見佢望住我有番啲笑容,睇呢下咗淡氣.
我現在先夠膽望一望自己隻手,俾Anna姐打到紅曬.

Anna姐望一望我問:[係唔係好痛呀.]

佢好溫柔咁摸住俾佢打到紅曬嘅手臂.
見佢有啲悔意,咁死都話無事啦.

我:[唔痛.]

我:[有無考慮轉打WMMA呀,我做你經理人丫]
Anna姐又做一個準備打我嘅手勢.

我:[嘩~~唔好再打,真係痛架,瘀曬啦.]

Asuka姐,明明係你闖禍,點解要我找數.

原本諗住Asuka大鑊啦,點知第二日佢兩個又無嘢喎,女人幾恐怖.
我越呢越迷?究竟發生過乜嘢事?

不過一個月之後Asuka就辭咗職,嗱唔關我事呀,
都唔係Anna姐公報私仇呀.

係佢申請日本個working holiday visa 批咗,佢話要去日本,
咁我地都有保持聯絡,有時叫佢幫我買嚇GAME.

臨走前Anna姐話請Asuka食飯,不過無我份,話係girls talk
至於Anna姐,佢無再嬲我啦.我地又好似以前咁,真係好想知Asuka講咗啲乜.

今日放假Anna姐話佢屋企部腦有問題,問我可唔可以上去幫佢睇下,
咁我當然應承啦.

我嚟過佢屋企幾次不過無乜點睇認真過,佢呢啲獨立屋有花園同2樓,好鬼大.
全白色嘅牆身,原木色傢私,走簡約風,再配一把白色吊扇,好有希臘風情.

我去到佢屋企門口按門鐘,佢門開咗但喺無人出呢,
我入到屋見佢原來喺度做瑜伽,

Anna姐:[你飲乜自己入廚房攞,我做埋呢part先.]

Anna姐:[部電腦喺嗰邊呀.]

咁我攞住罐可樂一邊飲一邊整機.
見佢喺度做瑜伽,忍唔住望多兩眼,佢著住緊身衫,紮起馬尾,身材玲瓏浮凸,從來都無見過呢個Look,平時只係知佢對腳靚,估唔到佢上圍都唔嘢小.
佢做啲高難度動作好似將隻腳向後拉,真係睇到我好難集中精神,佢做完行過嚟問.

Anna姐:[攪唔攪得掂?]

我:[無問題]

Anna姐:[咁我去沖涼先.]

當佢沖完涼行出嚟時我一睇,幾乎將罐可樂噴落個MON到.
佢下身著住一條熱褲仔,上身只係穿一件灰色小背心,
重點係真空呀,唔知係唔係ABC都係open 啲.
                  
佢行埋我身邊,企喺我背後,
慢慢將上身挨過嚟我側邊,

我可以感覺得到佢因為沖完涼身體所發出嘅微溫同香氣.
聽到佢嘅呼吸聲越嚟越近.
我開始心跳加速,手心冒汗,
佢柔軟嘅雙手放喺我肩膀上,然後喺我耳邊輕輕吹咗一口氣.                                                                                                                                                                                                                                                                                                                                                     
嗰一刻我汗如雨下,心臟幾乎停止跳動,                                   
佢細細聲問我,想唔想....
我企咗起身叫:想!!


Anna姐喺廁所伸個頭出嚟問:[想?乜相呀?]

我:[哦,無我諗起有啲相未download提下自己啫,無嘢,無嘢.....哈哈]
唔好意思我又喺度發白日夢.

整完機佢問我有無嘢做,我話無
佢叫我喺度食飯,佢話佢煮,但係見佢雞手鴨腳,睇怕好少煮飯,
我行過去佢個開放式廚房睇嚇佢攪乜,
我:[你掂唔掂架?]

Anna姐:[咩唔掂呀,你出去先啦,唔好阻住我呀,快啲出去啦]

等咗半粒鍾,俾我想像中快,我以為要改食消夜架.

Anna姐:[食得啦,]
見佢係廚房好興奮咁攞咗兩碟嘢出嚟

我:[咩嚟架?]

Anna姐:[卡邦尼意粉]

我:[啫係白汁意粉]

Anna姐:[係卡邦尼意粉呀,唔係白汁意粉呀.]

我:[一樣啫,]

Anna姐:[唔一樣架,]

我:[有乜分別]

Anna姐佢一手攞走:[咁你唔好食啦.]

我又搶返:[OK,OK]

Anna姐:[試下先啦,好唔好食啫?]

我食咗幾啖:[同白汁差唔多啫,]

Anna姐又再搶走碟意粉:[咁你返去食杯麵啦,杯麵啱你]

我又再搶返:[咦,嘩,有煙肉架喎,丫有趣有趣.]
Anna姐:[有我親自下廚煮俾你食仲咁多嘢講,你知唔知幾多人恨都恨唔到呀.]

我:[嘩~~我一下由最低級職員變身成全港最幸福男人,直頭人生無憾啦]

Anna姐:[洗乜講,仲唔多謝我]

我:[謝主龍恩]
我地一邊講笑一邊食,好開心.

食完佢話想出去行下,叫我陪佢.

咁我地就出咗去銀礦灣行.

我:[夜晚嘅銀礦灣其實好靚,特別係滿月,你會見到個月光慢慢由水平線升起,
海水泛起一片片銀光.]

Anna姐:[你成日睇?]

我:[有時一個人訓唔著都會出嚟行下,]

Anna姐:[其實我好羨慕你,有大把青春可以做鍾意做嘅事]

我:[做乜成日講到自己咁老,]

Anna姐:[如果我仲後生我可以好任性咁去做我想做嘅事.]

我:[你現在都可以任性架]

Anna姐:[我任性會傷害到好多人]

我:[你係ISIS?]

佢喺度大笑

Anna姐:[陪我落沙灘行下]

我:[好呀]

喺沙灘上面,雖然今日無月光,但係無月光就可以睇到另一樣野,就係星星
我諗好多人都已經唔記得你地頭頂上面個天其實係有星星架.
喺星光下睇到Anna姐心情超靚,笑得好甜.
唔知點解我好想佢笑,見到佢開心我就好滿足,
其實我同佢一齊喺呢度行係有少少尷尬,雖然梅窩少咗好多遊客,但係假日都依然有人入呢,
多數都係住銀礦灣酒店,而且都係情侶多,情侶最鍾意做乜?咪行沙灘囉.
咁我現在又咁啱同Anna姐喺度行沙灘,
原本都無乜嘢,但係一路行,前面就不斷出現一對對嘅情侶,我覺得我地好似拍緊拖咁.
差在我無拖實Anna姐隻手.

Anna姐:[又係度諗乜咁入神呀.]

我:[無嘢呀]

我:[你..覺唔覺得我地...好似.....]
我指一指前面迎面而來嘅情侶.

Anna姐耷低頭笑一笑:[你就想啦]
佢雖然係咁講,但係佢笑得好甜.

Anna姐:[你好想同我拍拖咩?你唔驚俾人笑咩?同個大你咁多嘅拍拖.]

我:[唔係...係,唔係,哎~~總之....我....]
佢又係度笑,

Anna姐:[口都窒埋,你點追女仔呀]

Anna姐:[好啦,咁我就俾你做住我一個鐘男朋友啦]
佢一手拖住我行出去海邊,
個感覺好唔真實,我係唔係又發白日夢呀?
唔係喎,我感覺到佢隻手好暖,好柔軟架喎,我唔係發夢喎,Anna姐真係拖.實.我.
我地慢慢行都最出,海浪拍打雙腳,好舒服.

我:[不如我教你睇星丫]

Anna姐:[睇星你都識?]

我:[識,你想睇兜巴星定係條隙星]

佢又追住我打
我:[女俠僥命呀!!女俠!!嗱~~唔好打面呀.]

結果我拖實Anna姐係沙灘行咗成個鐘先送佢返屋企.
我地個關係開始奇怪,情侶又唔係,好朋友又唔止,硬係好似有啲嘢阻住唔可以再行前一步,咁係乜?我都唔知.

終於到咗喺酒店攪event嘅日字,大家都好忙,各自有自己嘅嘢要做,
咁我就喺個場度走嚟走去,幫手攞下嘢呀,斟茶遞水咁,
因為要全日見客,所以連食中午飯時間都無,只可以食三文治.

真係由朝就忙到晚,Anna姐全日都要見好多由唔同地方嚟嘅客,一個接一個.
睇見都覺得辛苦.
個event會攪兩日,第一日總算無風無浪咁過咗,我同Anna姐差唔多九點先走,
咁夜所以同佢一齊食埋飯先返梅窩,我地是但搵咗間茶記食.
因為我第一次做呢啲event,所以乜都唔知

我:[公司每年都做呢啲event架?]

Anna姐:[係呀,]

我:[見你都好辛苦,見客見過不停.]

Anna姐:[無辦法啦,公司下半年生意好睇呢個event,所以一定要攪得好好睇睇,年尾有無雙糧都係睇呢兩日架啦.]

我:[咁大鑊.]

Anna姐:[真架,所以每一個客都不容有失架.]

我:[咁嗱嗱啉食完返屋企早啲訓,明天仲要搏殺.]

Anna姐:[我返屋企仲要做report俾總公司,邊有得休息.]

我:[唔係呀,有無嘢我可以幫到手架?]

Anna姐:[咁又唔洗.]

我細細聲講:[唉~~睇見你咁真係心痛]

Anna姐佢笑笑口講:[你心痛咩?]

@@!!俾佢聽到添.
我嗱嗱啉轉話題:[食飯先啦,凍咗唔好食架.]

Anna姐用餐刀指實我:[嗱~~唔好拉開話題呀.]

我再轉話題:[呀,好熱呀,點解唔夠冷氣咁架,想唔想飲嘢呀]

我:[唔該一支可樂,冰底,唔該.真係好熱....]

Anna姐將把餐刀越指越埋:[我問你,係.唔.係.心.痛.呀,快啲講.]
我唔知點答,真係答又死唔答又死,

我:[係呀,唔只心痛,仲有頭痛,腳痛,經痛添呀.]
佢又打咗我一嘢.

食完飯,我地就去搭船返梅窩,我送佢返屋企,

係門口我問:[真係無嘢幫到手呀?]

Anna姐:[幫我沖咖啡]

我:[我OK架]

Anna姐笑笑口:[唔洗啦.]

我:[真係唔洗?]

Anna姐:[係呀]

我:[咁我幫你整消夜丫?]

Anna姐:[唔洗呀]

我:[咁你唔好做咁夜啦]

Anna姐:[知啦]

我:[咁我走啦.]

Anna姐:[Byebye]

我:[Bye]

到咗第二日,
朝早又係同尋日一樣,大家都好忙,到咗lunch食少少嘢,
聽到班PKMON喺到講條麻煩友又嚟咗,我問乜嘢麻煩友?
佢地話係個印度佬.
印度,呢個國家真係好奇怪,點解可以咁極端,貧富懸殊得咁緊要,
你話佢地蠢咩,又唔係,你睇啲 IT野佢地搶曬嚟做就知,但係佢地又好似無乜文化咁,你睇間唔中就一單大到可以做國際新聞嘅強姦案就知,總之就係一個奇怪國家,係唔係啲所謂文明古國都係咁?

咁呢個印度佬又衰乜野?咪又係鹹濕,佢連呢班PKMON都落到手咁你就知佢幾餓.

我問佢地今日邊位咁好彩可以俾印度佬寵幸呀
佢地話係Anna姐,嚇!!!

Anna姐見客基本上其他人都唔會行埋去打擾,因為唔同級數,佢見親到係大粒,唔係一般薯仔.
我只好離遠咁望過去睇下有無事,見印度佬坐到鬼死咁埋,就知佢不懷好意

睇睇下May姐叫我幫手做其他嘢,我只好邊做邊偷偷睇下啦,當我做做下嘢時轉身睇下,

一睇就見到印度佬隻手,佢摸住Anna姐大髀,Anna姐一手推開佢,唔夠5分鐘又嚟.

WTF!!!我都只係摸過佢隻手咋,你條印度佬居然摸佢大髀,你估你識出yogo fire就好勁,
我都識出昇龍拳架.

我即刻走過去,
佢見我衝過去佢立即縮手,
我地互啤咗幾秒,
我心諗,呢丫,出火丫,你一出火我就一嘢昇過去,出丫.

正當我準備好人生第一次真人街霸時.

Anna姐好兇咁望住我,問我.

Anna姐:[做咩呀]

我:[佢...]

Anna姐:[你睇唔到我見緊客咩?行開]

我:[但喺佢...]

Anna姐好大聲咁講:[OUT!!]

突然間成個場靜曬,其他人立即望過嚟睇嚇乜嘢事.
嗰一刻我就知我唔洗打已經輸咗啦,你好嘢印度佬,出外掛.

我好唔開心咁行開,但係我都喺老遠咁望實佢地,睇下印度佬重會唔會亂嚟.

一個鐘之後,佢地終於都傾完,印度佬走時仲特登走過嚟我呢邊,對住我陰陰嘴笑.
點呀,入錢挑機呀印度佬,係唔係想ROUND 2呀,唔驚你架.

結果我就啤到佢出門口.
當佢走咗之後Anna姐走過嚟一手拉我行埋一邊.

Anna姐:[你頭先做乜呀,你唔見我見緊客咩?]

我:[我見佢手多我咪.]

Anna姐:[你知唔知佢係大客呢架,你知唔知單係佢一張單佔公司生意額幾多成呀?]

我:[但係佢...]

Anna姐:[我識得保護自己呀]

我地開始越嘈越大聲.
我:[但係佢頭先非禮你呀]

Anna姐:[有時對住呢啲客係咁架啦,大庭講眾佢可以點.]

我:[喂!唔係大客就惡曬架,唔得呀,唔可以咁呀]

我:[我唔想有人傷害你呀,你明唔明呀,大客就可以非禮你架,咁同做.....]

個雞字都未講出口,我已經feel都塊面好熱,痛楚由左邊面慢慢伸延至右邊面.
個頭45度由左擰去右邊.

我俾Anna姐好大力咁打咗一巴.

我定咗幾秒,無咗返應.

我只係聽到:[即刻同我消失]呢六個字.

返到梅窩好唔開心,走咗去搵威哥吹水,講曬成件事俾佢聽.

我:[好唔開心呀,明明我無錯都俾Anna姐車咗一巴]

威哥:[睇呢你都好緊張佢喎,]

我:[咁,同事丫嗎.]

威哥:[係唔係只係同事你自己最清楚.]

我:[咩呀,人地大過我架,]

威哥:[SO]

我:[人地仲有一個係美國嘅男朋友架],

威哥:[SO]

我:[咁邊有可能]

威哥:[我係問,你係唔係鍾意咗人呀?鍾意人同頭先你講啲嘢有關係咩?乜大過你有男朋友你就唔可以鍾意人咩?]

威哥:[你自己諗下,你唔鍾意人又點會做咁多嘢,又咁緊張人.]

我Look大對眼望住呢個成日同我吹水睇鹹片嘅麻甩佬,佢居然講得出頭先嗰啲嘢?
你唔係威哥,你係邊個?唔通你係上帝!!!

我一路都唔去想,唔夠膽承認嘅事實,係!我係鍾意Anna姐.

但係我地相差咁遠,我地係兩個世界嘅人.
我同佢有可能嗎?

威哥:[睇嚟唔洗我開解你啦]

我:[點解?]

威哥:[有人接班,咁我走啦]

我:[嚇?]

我望去威哥度,見佢行開咗,見佢身後係Anna姐企咗喺到.

我望住佢,佢又望住我,大家都無出聲,佢坐咗係我側邊.

正當我諗緊好唔好開聲先,佢突然講咗一句我以為我聽錯嘅野

Anna姐:[我係第三者]
嚇!!!今日發生乜嘢事?上帝你唔好玩我啦,最多我燒啲金銀衣紙俾你啦.

Anna姐:[我係一個第三者]

我:[咩呀,你男朋友唔係喺美國咩?你仲話會同佢結婚.]

Anna姐:[佢係喺美國,但係佢結咗婚.]

Anna姐:[雖然我地喺埋一齊好耐,但係佢一早就結咗婚,而且我係知,我心甘情願做第三者.
我同佢一開始就係錯,就係因為我嘅任性,我唔想傷害任何人,包括你.]

Anna姐:[我知你對我好,但係....對唔住,我地過咗條底線,我地唔可以再咁落去.]

Anna姐:[你仲細,將來你一定會搵到一個比我好嘅女人,我唔值得你對我好,我唔係你想像中咁架,唔好再喺我身上浪費時間.]

佢講完之後見佢眼有淚光,
我一手拉實佢唔想比佢走,但係佢甩開我隻手
咁就轉身走咗,
我只係見到我手背上有一滴眼淚,係Anna姐嘅眼淚.
我一個人坐喺碼頭,唔知坐咗幾耐,

唉~~尋日仲好地地,點解今日會攪成咁?
明明就係差嗰一步,我地唔係就可以成為情侶咩?
佢知道我鍾意佢,佢都接受我架,但係點解?
Anna姐明明已經肯開放心扉,點解佢又再封閉自己,唔俾人接近佢,

究竟發生乜嘢事?點解呀?我做錯咗啲乜嘢呀?
我問咗自己好多個問題,但係我一個答案都搵唔到,
我真係唔知
我只係知我原來唔係第三者,我係第四者,而且一開始就係一個輸家.

近日見Anna姐好緊張,可能係因為公司有大粒過嚟,重要係最大個粒CEO.

Event之後其實已經幾個月,呢幾個月真係度日如年,
唔係多嘢做呀,而係我同Anna姐個關係,佢都係同平日一樣,對其他同事有講有笑,

但係對我,佢唔係黑面,
係好明顯佢有心疏遠我,佢好多時都特登避開我.

我地個關係又打回原形,佢現在係100%AT力場全開,你用N2地雷炸都唔入.
不過日子再難過都要過,呢個係我自己嘅選擇,選咗,條路再難行都要行.

今日一早就捉曬所有人開會,因為下午CEO就嚟.
咁又睇下呢位CEO有幾大粒,反正對我呢啲薯仔無乜影響.

我地公司十幾人企曬係度歡迎CEO,
終於等到佢嚟,呢位亞叔叫Paul,睇怕都六張幾,高大身型
應該都好多時間做GYM,因為都幾fit下,幾大隻.

同行仲有一個女仔叫Nina,年紀都應該差唔多30,
不過鬼婆好難睇年紀,保養得好同唔好差好遠,
佢係亞Paul叔個女,都係公司做.

咁我地都係好例牌自我介紹.做完呢啲嘢之後就係佢地啲大粒會議,我地做返自己嘢.
今晚重會同佢地食飯喎,咁有得食我一定食架.其實我係有目的嘅,點解?一陣話你地知.

食完飯咁就散水啦,因為CEO有車接送,唔洗我地啲薯仔送,咁大家都各自歸家.
無錯啦,由於我同Anna姐係同路嘅,所以佢無得再避我啦.Yeah~~

我地一齊搭船,其間無咩特別嘢講.

同佢搭船時見佢神不守舍咁,唔係唔見呢樣就跌個樣

我:[見CEO好大壓力呀,見你呢排好緊張.]
佢無即刻答我,好似諗緊嘢咁,

Anna姐:[係呀,要交功課丫嗎]      

我:[難唔到你丫]

佢笑一笑,無出聲.
我:[你明天要同佢地周圍去?]

Anna姐:[係呀]

我:[IC]

我:[咁你今晚早啲休息啦.]

Anna姐:[唔]

唉~~,我都係衝唔開佢個力場,
不過有佢坐喺身邊現在都已經好滿足,都唔夠膽再想太多,
唉~~我地又變返做陌路人咁,
個感覺好難受,明明大家都有feel,點解會走回頭路?俗世人嘅標準真係咁可怕?

我只不過係鍾意咗一個,有個男朋友,大過我十幾年,同身居要職嘅高層之....嗎
好過份咩?
係....我知可能係過份咗少少,咁起碼佢都未結婚呀.

今日星期六放假,係屋企又無嘢做,磨到中午先起身出去食飯,
之後就咗去搵威哥,

其實佢知道咗我衰咗之後都無講啲咩嘢,只係拍拍我,一切在心中.
不過威哥始終都係鹹濕佬一個,我心情唔好佢都無好日子過.

威哥:[你好耐無幫我B 4仔啦.]

我:[我無心情丫嗎.]

威哥:[咁你幾時先有呀?]

我:[唔知喎.]

威哥:[我就嚟癡線架啦,你當可憐下我啦.]

我:[妖~~]
但係睇見佢個死樣,雖然我心情唔好啫,無理由要啲兄弟同我一齊受苦架嗎.

我:[唉~~返公司幫你B.]

威哥:[唔該你呀.]

返到公司鬼都冇隻,當然啦,今日假期,係得我咁灰要喺到B 4仔先返嚟啫.
一路喺房都係好鬼靜,咁我咪打嚇機磨嚇時間,

B到7點幾諗住走人,突然間聽到有開門聲,大鑊,俾人知我喺到B野炒硬.
嗱嗱啉熄燈坐喺地下唔好俾人知,
聽到有腳步聲行近,死啦,呢次炒硬.
不過行行下又走遠咗,跟住聽到有把男聲講no one here

鬼佬?做咩有鬼佬喺到?唔通Paul返咗嚟,
俾佢知我喺到B嘢分分鐘害埋Anna姐,

都係靜靜雞走人,但係唔得喎,開大門會好大聲DO一聲,實知架喎.
咁只好喺度等佢走咗先,希望佢可以快啲走.

7點幾返呢做乜?聽聲佢好似入咗Anna姐間房.

入去做乜呢？好奇心之下想知咩嘢事,

作為一個IT人要知公司發生咩嘢事其實唔係好難,
特別係現今世代,間間公司都要用net meeting只要hack入個cam就乜都睇到,
何況我跟本唔需要hack.

開咗部腦攪幾攪就開咗Anna姐間房部cam,

嘩一睇個畫面,見到隻鬼原來帶女上公司偷食
估唔到原本諗住返呢b 4仔點知有真人show睇

死鬼佬偷食就返酒店啦,如果我錄低你真係黃河水洗都唔清.
一路只係睇到鬼佬個樣.,但係就睇唔到條女,唔知咩樣,

等佢地換個姿勢先知,睇睇下佢真係換姿勢喎,睇下乜野質素嘅女女,究竟係老蘭定灣仔先.

有時真係覺得自己唔應該咁八卦,原來有啲嘢唔知好過知.

我睇住呢個畫面,唔知應該點做,






我坐咗係地下,我唔想再去諗剛才我見到個畫面.但係越唔諗個畫面就越出現,我可唔可以係呢一刻從呢個世界消失,唔知坐咗幾耐,聽到門聲,佢地應該走咗.

我又唔知喺到等咗幾耐,我先行出我房,成個人好似無咗靈魂咁,點解個心痛得咁緊要,呢個感覺就同我當年亞爸亞媽交通意外一樣.

我好似連人生最後一條支柱都斷埋咁.
我唔知自己用咗幾多分鐘先行都去Anna姐房門,我想最後一次再睇一睇呢間房入面嘅嘢同回憶,眼淚已經將我嘅視線模糊曬,我開始睇唔清我前面嘅景物.

當我正想推開門時,房間門突然打門,

係Anna姐,原來佢未走,
我相信佢睇到我,同我見到佢一樣咁震驚.

當我平復心情時已經喺船上面,Anna姐佢坐喺我側邊,佢一路都好大力咁拖實我隻手唔放,好似驚一放手我會立即跳落海咁,一路我地都無出聲.

落咗船之後我地坐咗喺碼頭好耐.
係佢開聲先.

Anna姐:[你知道曬?]

我:[唔,]

我:[事業對你呢講真係咁重要?值得你咁樣付出咩?]

Anna姐:[唔係呀,]

我:[咁點解?大客就可以非禮?大老細就可以上床?]

Anna姐:[唔係你諗咁樣架]

我:[咁係乜嘢?]

Anna姐:[佢就係我同你講個位男朋友.]

我:[嚇!?佢係你男朋友?佢可以做你老豆呀?]

Anna姐:[我都大你好多呀.]

Anna姐:[我從來都無對任何人提起我嘅過去,知唔知點解?]
Anna姐:[我係一個孤兒,我父母喺我幾歲時就唔要我,你知唔知一個華人係美國生活已經難,當你喺一個孤兒就更加難.]

Anna姐:[我係修道院大,我細過經常俾人蝦,喺學校又係咁,喺修道院又係咁,所以我好反叛,
到咗16歲就要離開修道院去寄養家庭生活,但係佢地只係為咗錢先收養我,結果我偷走咗,]

Anna姐:[一個女仔乜都無,除咗出賣肉體仲有乜方法可以生存,我去咗club度做,]

Anna姐:[係club度我識到Paul,係佢將我由地獄拉返出嚟,佢幫我離開以前嘅生活圈,俾錢我讀大學,我畢業之後就開始同佢一齊,佢仲幫我入佢公司做嘢,我今日所有嘅都係因為佢,無佢我可能已經自殺死咗啦.]

Anna姐:[初初我係真心鍾意佢,但係呢幾年開始變咗,]

我:[佢變咗心?]

Anna姐:[唔係,係我開始分唔清我係真心鍾意佢,定係還債俾佢.
我覺得我欠佢好多,但係我係唔係要用一世時間嚟還俾佢?]

Anna姐:[你知唔知咁多年嚟所有大時大節都係我自己一個人過,我每次見到Paul一家人好開心我就好難受,]

Anna姐:[我唔想成世做人情婦,我好驚有一日佢太太會上門搵我,話我搶走佢老公呀,]

Anna姐:[我唔想再咁過日子呀,呢個問題困擾咗我好耐,直至....]

我一路都對Anna姐過去一無所知,當我聽都呢到先知點解每一次講起佢男朋友都唔想提
原來咁複雜
我:[直至?]

Anna姐:[直至你出現]

我:[我?]

Anna姐:[你記唔記得你講,明知道無好結果點解仲要做?]

我:[記得]

Anna姐:[你一句說鬧醒咗我]

Anna姐:[我可以再咁落去.]

我:[但係你又同佢....]

Anna姐:[我唔知呀,我好想同佢講我地個關係要完,唔可以再咁落去,但係每次當我見到佢我就好亂,我講唔出口.]

Anna姐:[我唔知點面對佢,我更加唔知點面對你呀,因為我同你都係錯架,我地根本就唔應該開始,]

佢好大力咁攬實我,
Anna姐:[我知你喜歡我,我覺得同你一齊好開心,我可以好放鬆,唔洗再擔驚受怕,]

Anna姐:[但係我唔可以再咁自私呀,所以我先拒絕咗你,你同我一齊你會好辛苦,我唔想你咁,我過去一啲都唔光彩,我唔係你嘅白雪公主,你明唔明呀?]

Anna姐:[點解我每一次有困難你都會係我身邊出現?點解你要對我咁好?從來都無人對我咁好,點解呀?你知唔知呀?你先係我嘅Guardian angel呀,我鍾意你喺我身邊呀,你明唔明呀?]

Anna姐:[我好想好想同你一齊,但喺我又唔可以呀,我好辛苦呀.]

佢喊得好大聲
我感覺到我心口好熱,佢嘅眼淚已經將件衫整濕曬.
同樣我啲眼淚已經滴濕佢件衫.

我:[對唔住,我誤會咗你]
我終於明白點解Anna姐一直都封閉自己,原來係因為過去嘅包袱.
佢喊咗好耐,好似將積壓咗好耐嘅情緒一次過爆發出呢,我等佢平靜返.

我就送佢返屋企,喺佢屋企門口佢問咗我一個問題.

Anna姐:[你今晚可唔可以留低陪我]

我:[唔]

今日起身同平日好唔同,點解?
因為唔係訓係自己張床囉,而係喺Anna姐屋企過咗一晚,
雖然話乜嘢都無發生過,但係人生第一次有女人攬實訓嗰種感覺真係.....原來可以咁舒服.

你地當然會問有無攪錯呀,第一次同自己鍾意條女攬實一齊訓居然無攪嘢,
喂!!唔係個個都用下體諗嘢架,尋晚人地好down,想搵人陪乍.

我同佢都發展到呢個地步點會無機會呢,以後仲有大把好日子過,嘩哈哈哈~~

Anna姐睇嚟一早就醒咗,當我落到樓下見到佢係廚房準備早餐.

我企喺度望見佢著住件一件頭睡衣,露出一對雪白美腿.
如果我有手機喺手,我一定變成癡漢係咁影.

Anna姐見到我企咗係度唔郁就知我喺度睇乜.
佢笑笑口叫我.

Anna姐:[睇夠未,睇夠就過嚟食早餐啦]

我:[你又知我睇乜]

Anna姐:[我知你成日喺公司偷睇我對腳,女人對呢啲{鹹.濕.佬}目光好敏感架.]

我:[無嘢好講......斷正]

Anna姐:[我開始有小小後悔俾你乘虛而入添.]

我:[喂!!我乘虛而入?喂尋晚最唔開心嗰個好似係我喎.]

佢攬實我,今次好唔同,我地終於係面對面,我可以感覺到佢嘅心跳,佢嘅每一下呼吸,
我地塊面開始越嚟越貼近對方,我可以感受到佢咀唇上嘅輕微震動,我地終於可以相吻,今次唔係發白日夢,係真真實實嘅一吻.初吻呀~~~~

突然電話響起,睇佢面色一變我都估到係邊個搵佢,應該係Paul.
睇嚟我仲有一隻BOSS未打,咁你就睇下我點KO佢.

佢攞起電話,講咗兩句就收線.

我:[Paul?]

Anna姐:[唔,佢搵我食早餐.]
呢次到我面色變

佢雙手拍住我塊面講
Anna姐:[不過我推咗佢啦,我話我約咗個鹹濕佬呀.]

我地食完早餐就落街行下,今日天氣唔錯唔係太熱,有海風吹過嚟特別舒服.
一路行我拖實佢,佢左右手一齊蹺實我隻手,成邊車頭燈壓實我手臂.
我下體真係有小小反應,OH MY GOD,晨早就咁攪,我驚頂唔順.

行行下佢突然問我,

Anna姐:[你尋晚係公司做乜?]

我:[我......]

我:[威哥囉,佢話有套新戲出咗叫我幫佢download.]

Anna姐:[哦,你用公司資源DL嘢]

我:[咁你夠....]
@@~~~~~~~!!!,又講錯嘢.

佢靜咗幾秒,

Anna姐:[你俾啲時間我,我會處理.]

我:[你諗住點?]

佢無出聲,其實我知佢係未決定點做.
對佢嚟講,我同Paul都唔係最好選擇,Paul有老婆,但係我又細過佢,
好似佢講咁,兩邊都係錯,我地呢對三角關係都算複雜.
突然唔知邊到嚟嘅勇氣,我捉實佢對手,我對住Anna姐講.

我:[我係唔會放棄,唔會咁輕易俾Paul喺我身邊搶走你]

佢又再攬實我
我地身貼身,佢可能feel到啲硬嘢,跟手輕輕推開我,打咗我一嘢.

Anna姐:[你又諗緊啲乜嘢呀,嚇.鹹.濕.佬.]

我:[我....我...我急尿呀,急尿呀,哈哈]
Anna姐:[係呢,點解你會夠膽追我?我大過你咁多,又係你上司.]

我:[乜唔係你追我咩?又搵我食飯,又成日聊我傾計.]

佢又打咗我一嘢
我:[我記得嗰次喺碼頭見你唔開心,唔知點解我就有一種想要保護你,想你開心嘅感覺,
可能係緣份呱.]

Anna姐:[你信咩?]

我:[信,如果唔係我都唔會喺到出現]

我:[你諗嚇,如果無緣份,我同你,南轅北轍有乜可能可以喺埋一齊]

我忽然記起啲嘢:[跟我嚟,]

Anna姐:[去邊?]

我一手拉住Anna姐隻手:[去見上帝呀]

Anna姐:[嚇!?]

我拉住Anna姐去M記.
Anna姐:[上帝幾時去咗做M記.]

我:[威哥]

威哥行出嚟見到我拖實Anna隻手,跟住笑笑口同我講,

威哥:[嘩,我叫你幫我B 4仔啫,你咁好直頭搵個真人俾我,咁點係呀.]

我啤咗佢一嘢
我:[咩呀,你講乜呀]

威哥:[哈哈,講下笑乍,唔好介意.]

Anna姐:[唔會]

Anna姐喺我側邊細細聲講:[4仔呀,乜唔係新戲咩?]

我:[哈哈]

威哥:[現在咁咪幾好,個傻仔呢幾個月呀無曬心機呀,我幾驚佢跳海呀.]

Anna姐喺度微微咀笑.
我地講咗幾句就出去,費事阻威哥做嘢.

Anna姐:[你做乜叫佢上帝?]

我:[佢有時會開上帝MODE好堅架.]

Anna姐:[唔知你講乜.]

我:[其實佢已經係我最親嘅人,我父母走咗之後佢就係對我最好嘅人,有乜嘢我都會同佢講.
話俾佢知就好似話俾亞爸亞媽知一樣.]

Anna姐:[你以後仲有我呀]

之後我地四周圍行下食下嘢,
我地過咗好平靜但係又好溫馨嘅一日.

終於到咗我最期待嘅夜晚呢啦 WOOOoooooooo~~~~~

食完晚飯我地慢慢行返佢屋企,
一路我已經諗好曬點做,做乜先,幾多下之後又點,真係諗起都興奮,
去到屋企,佢開門入屋先,我跟喺佢後面,正當我打算入屋時,佢一手阻實我唔俾我再行多一步.

我:[做乜唔俾我入?]

Anna姐:[因為夜囉,]

我:[夜咁仲唔俾我入去?]

Anna姐:[因為明天要返工囉,]

我:[我知呀]

Anna姐:[咁你係唔係要早啲訓,明天早起身?]

我:[係呀]

Anna姐:[咁咪要返屋企囉]

我:[嚇,你尋晚唔喺叫我留低陪你咩?]
Anna姐:[係呀,尋晚丫嗎,Not today.]

我:[嚇!!!~~~~~~]

Anna姐:[早啲返去訓,明天唔好遲到,我喺碼頭等你OK]

我只好死死地氣咁答:[ok]

不過臨走前佢拉實我,錫咗我一啖當補數.

我拖住死狗嘅心情慢慢行返屋企,
終於明白乜嘢叫有食唔食,罪大惡極,
早知尋晚我就獸性大發,做咗先算啦.
我個破處大計無咗啦.

星期一,如常返工,唔同嘅係,我今日係拖實Anna姐隻手返工
咁當然喺中環碼頭就各自各行啦,始終辦公室戀愛,越少人知越安全,佢行先我行後.

喺後面望住呢位中環女強人,有幾多高薪要職成功男士,公子哥兒都夢寐以求想追到手嘅靚女,
居然會同我一齊,世事真係好難料.

不過我都唔係贏硬,就算我地唔介意雙方年齡,階級,差距,
仲有一道高牆喺我地中間,佢就係Paul
而且呢道高牆係Anna姐佢自己起,只要佢一日唔打破,我一日都係無可能過到呢一關.

要佢作出選擇真係好難,同我一齊佢就要放棄現有辛辛苦苦用十幾年時間,建立返嚟嘅事業,要一個四十歲女人做一個咁樣嘅決定係唔係有點過份?其實我係唔係好自私?

之後嘅事我係唔知點做好,佢地雙方已經有好根深蒂固嘅感情,而我只係啱啱同佢開始,
感情基礎非常薄弱,只要Paul做小小嘢佢就可以KO我,嚟緊只好見步行步.

今日佢地成日開會我連見Anna姐嘅機會都無,其實我好不安,每一次我諗起佢同Paul一齊我個心就跳得好緊要.好擔心,嗰日個畫面就會喺腦入面浮現,我跟本完全集中唔到精神.
不過好彩今日Paul個女都喺度,如果唔係我會癡線.

中午佢地三位高層去飲茶,咁當然無我地啲薯仔份啦,佢地臨出門口時,Anna姐佢擰轉頭望咗我一眼,
就係呢一眼,我覺得佢好似向我求救咁,望住佢地走我嘅不安情緒已經去到臨界點,我要暴走啦!

我起身諗有乜方法可以埋佢地身,行嚟行去,突然被我諗到一個方法,
我衝去搵May姐.

我:[May姐!!有無文件趕住要俾Anna姐簽名架.]

May姐:[無喎]

我:[咁有無啲乜嘢可以俾Anna姐簽名架,假紙,糧單,信封都得架.]

佢有啲吃驚咁望住我
搵咗份嘢俾我,我都無理係乜嘢就狗衝咗出去,
不過衝唔夠10秒我又衝返轉頭.

我:[May姐,佢地喺邊飲茶?]

May姐:[大會堂]
跟住我又再衝過.

去到大會堂咁多人點搵,其實唔難

因為唔係個個人都有spotlight喺頭頂,要喺人海之中搵呢啲人只要睇下附近有邊張檯身邊最靜,最少人行過去,最重殺氣就一定係佢,Anna姐啲氣場唔講得笑架.

果然最遠處就見到佢地,
我喘曬氣咁衝過去佢地到,佢地3個用好奇怪嘅目光望實我.

我喘住氣咁攞咗份文件出嚟俾Anna姐
我:[ur, ur, urgent]

佢攞喺手當然知乜嘢事啦,
Anna姐果然係見慣場面老手,佢完全面不改容係上面簽咗個名,交足戲呀.

Paul當然唔知乜事,但係我同Anna姐就喺度會心微笑,佢明白我點解會嚟,

我仲有最後一招超必要出啦,大家睇嘢啦

我不停咁喘氣,亞Paul見到我咁就講

Paul:[Come on son, sit down please.]

我:[OH Thanks]

我:[唔該加多個位]

就係咁我就成功開超必贏咗,坐低咗啦.

我坐Nina對面,左邊係Paul,右邊係Anna.

呢個組合真係好有趣,左邊係老板加情敵,對面係老板加情敵個女,右邊係上司加情人,
Anna姐就面對左邊係新歡,對面就舊愛,右邊就舊愛個女,嘩,真係複雜到呢.

其實佢地喺到講乜我一句都聽唔入耳,
點解?

因為喺檯低有一隻好溫柔嘅手拖實我囉.

做戲做全套,我坐一陣就走,話曬都有[重要文件]喺身.
Paul Round1 我贏
佢地食完飯返到公司,Paul同Nina因為要{打邊爐},所以Anna姐行先,我當然喺lift口等埋佢啦
我地入到lift,有班C奶喺度所以好鬼嘈,

Anna姐細細力搣咗我一野,佢細細聲笑笑口同我講:[你想死呀.]

我又細細聲講:[我講過我唔會俾Paul喺我身邊搶走你.]
佢好甜咁笑咗一下.

我地前後腳返到公司,
心入面覺得終於小勝一場,雖然呢場仗仲有排打,
但係我有信心,我一定贏,
我好耐未試過有想打爆機呢團火.

收工時Anna姐搵借口話唔舒服所以無同Paul食飯,
如果佢今晚去同Paul食飯,我真係唔知自己會點.

好彩我地又可以一齊搭船返梅窩.

返到去佢屋企,上次見佢雞手鴨腳所以都係我煮飯啦,

我:[嗱,兩餸一湯,]

Anna姐:[睇落唔錯,不過都係食過先知]

Anna姐一邊食一邊講:[真係唔錯,唔錯.]

我:[當然啦,我喎.]

呢餐飯其實食得有啲辛苦,
我地一路避開Paul呢個話題.
東拉西扯一番.

食完飯佢洗碗,我坐咗係廳,佢洗完就坐係我身邊,屈高雙腳放梳化,成個人挨住我坐.

Anna姐:[做乜對我咁無信心.]

我:[我唔係對你無信心,我係對我自己無信心.]

我:[我以為我可以面對你同Paul喺一齊嘅場面,但係原來唔得.]

我:[你兩個一獨處我就心跳得好緊要,個心好痛,痛到想一刀插停佢,等佢唔洗再亂跳.]

我:[我開始明白做第三者嗰種痛苦,睇住自己心愛嘅女人同第二個男人一齊,真係好痛苦.]

我:[我知你無可能一時間做出乜嘢決定,我只係想你知我唔可以無咗你.]

我:[你已經係我嘅全部,你嘅喜怒哀樂,你每一樣嘢都會牽動我嘅情緒,無咗你我會死架.]

佢好大力咁攬實我.
Anna姐:[我應承你,我唔會同Paul獨處.]

雖然我知道呢個只不過係一個美麗謊言,
但係我又可以點?

我:[我今晚想係度過夜.]

Anna姐:[唔]

夏天嘅朝早光得特別早,6點已經光到你唔起身唔得,

我諗你地最關心喺尋晚點?

咪............................................

做咗IT段譽囉,喂!第一次係咁架啦.笑乜呀,收聲.

因為我要返屋企換衫,所以俾Anna早出門口,
係呀,你無睇錯係無咗個{姐}字,因為我已經係佢嘅人,唔係,係佢已經係我嘅人,所以身份唔同咗囉.

今日係Paul最後一日喺公司,總算唔洗再對住佢.
佢走咗就一天都光曬,起碼現階段係.雖然我知道始終有一日會再面對呢個問題,
或者到時Anna會有一個決定.

喺船上面Anna問我
Anna:[最早出中環班船幾點?]

我:[6:20,做乜?]

Anna:[無,突然間諗,有無機會搭船睇日出?]

我:[香港?]

我:[打通頂機之後望出窗口易啲囉.]

Anna:[你浪漫少少得唔得架.]

我:[嘩,幾歲呀]

Anna:[你係唔係嫌我老呀.]

我:[奴才不敢,奴才不敢]

Anna:[拖你出去斬.]

Anna:[聽聞愛琴海日出好靚,Oia就日落最靚.]

Anna:[不如我地去睇下囉,]
我:[喺邊架,]

Anna:[希臘呀.]

我:[嘩有鬼錢同你去,]

Anna:[咁我同第二個去,]

我:[咁又唔好.]

Anna:[咁我地下年一齊攞大假去好唔好呀?]

我:[好,你喜歡啦,]

Anna:[啦,你應承我架,唔好到時話無錢呀.]

我:[你當我係乜嘢人,我講得出做得到]
唔課金,買少啲 game應該都夠.................機票錢呱.

返到公司大家照舊,我又死返入房.
做到咁上下突然叫曬所有人出去,

我終於等到呢一刻嚟,

Paul終於走啦,我唔洗再睇見佢同Anna一齊個畫面.
真係飲得杯落,大家目送佢行出門口,
我幾乎叫咗出呢.YEAH~~~~

我決定今晚同Anna出去食餐好啲慶祝嚇,
咁我即刻Google嚇附近有咩唔太貴我俾得起嘅餐廳先.
Soho 啲餐廳唔係講笑,個價錢分分鐘一餐夠我食成個星期.
搵咗間睇落唔錯嘅steak house,訂咗位.
到差唔多時間我就去攞位先,好好采俾咗個窗口位坐.
由呢個位望出窗外係藝穗會,夜晚黃色街燈下影照係呢間古蹟真係幾靚.

等咗一陣Anna就到.

Anna:[做乜呢食呢間?]

我:[心情靚咪食嚇好嘢.]

我:[叫嘢食先]

Anna:[咁我食caesar salad,]

我:[你夠架啦,唔洗同我慳喎.]

Anna:[女人夜晚唔好食咁多,好易肥架.]

我:[你咁fit,你睇下May姐食量幾恐怖,係你幾倍.]

Anna:[你死啦,我話俾佢知你話佢大食.]

我:[唔好呀,佢一陣又叫我去做苦力架.]

Anna:[知驚嗱.]

我:[咁我食steak.]

我:[唔該,一份caesar salad set,另外一份Angus set 要medium well]

Anna:[你今朝先話無錢,現在又食好嘢?一時一樣.]

我:[間唔中都要放縱嚇自己嘅.]

Anna:[你唔係想放縱,你係見Paul走咗所以好開心,係唔係?]

我:[係,Paul走咗對我呢講絕對係好事.]

我:[雖然我咁講你未必喜歡,但呢個係事實,佢係度我會唔舒服,好辛苦]

Anna望住窗外講:[我都話,你同我一齊,你會好辛苦架啦]

我捉實佢隻手同佢講:[如果我辛苦可以令到你幸福,我唔會介意]
佢微微咀望住我笑,無出聲.

我:[你有無聽過一首歌叫因為愛所以愛?]

Anna:[無,]

我:[你啲 ABC唔識架啦,]

我:[呢首歌係謝霆鋒唱,佢同一個大佢11年嘅女人王菲一齊,
佢當年受嘅壓力都好大,人地現在咪又係喺埋一齊.]

我:[我無你想像中咁脆弱,再苦嘅路我都行過,]

我:[而且現在我有你同我一齊行,我唔覺得辛苦.]

Anna:[我記得我初初識你時你好無自信架,現在成個人變曬.]

我:[可能因為有咗目標.]

佢笑笑口問:[目標?邊個呀?]

我:[May姐]

Anna:[嚇!?]

我:[May姐啱啱係對面行過.]

佢細細力打咗我一嘢

Anna:[你驚俾人知我地嘅關係咩?]

我:[我驚乜,我係唔想影響你咋.]

Anna:[你都唔驚咁我驚乜.]

我:[唔想人講你閑話,話你食我呢啲小鮮肉咋.]

Anna:[你係小鮮肉?你似冰鮮肉多啲囉.]

食完晚飯我地慢慢行去碼頭
我地企喺到等船

Anna:[你仲記唔記得你第一次係嚟度想用魚蛋開解我呀?]

我:[記得,白癡到爆,好似尋日嘅事咁,我諗都無諗過現在會同你係埋一齊.]

Anna:[可能係緣份.]

Anna:[講樣嘢俾你知丫]

我:[乜嘢?]

Anna:[其實Paul走咗我都鬆咗一口氣.]

我:[點解?]

Anna挨住我膊頭講:[因為我都想同你一齊囉.]

第十八回

我同Anna正式係埋一齊都有幾個月,公司當然無人知啦,費時咁張揚啦.
我地平日都好低調,係返到梅窩我地先會拖手.

你地可能會問,我地現在係唔係住埋一齊?無喎.
點解?因為Anna真係一個工作狂,

唔係講笑,好多時係屋企佢都會做到十一,二點,
我有問過佢做乜咁搏?佢話佢好享受嗰種成功感.

佢現在所有成就都係佢自己一手一腳打返呢,完全同Paul無關係.
見佢咁唔想騷擾佢做嘢,

所以平日多數都係我煮飯,煮完同佢一齊食,食完洗埋碗我就返屋企,
咁我星期六,日都會係度過夜嘅.
我現在好似變咗賓賓....

而且....我知Paul會打電話俾佢,每次見佢有電話就會入房傾咁我就知一定係Paul,
每次見佢同Paul講電話我個心都仲係好唔舒服,但係又可以點?
有一次我聽到Anna係房細細聲喊,夾係我同Paul之間Anna同樣痛苦,Paul對佢越好佢越內疚,
我唔希望見到佢唔開心,所以我無比壓力Anna,我只可以做好本份.

其實我返屋企都有嘢做,唔係打機呀,
自從我同Anna一齊我就少咗打機.
因為我搵咗啲 freelance做,幫人寫app,
我想搵多啲錢,我知我同Anna差距實在太大,我要努力拉近個差距.

今日同平時一樣,食完飯我就返屋企開工,一做就差唔多十一點.

做做嚇突然電話嚮,係Anna

我:[喂!]

Anna:[做緊乜呀?]

我:[寫app]

我:[你呢?做完嘢嗱?]

Anna:[唔]

Anna:[你呢?寫完未呀?]

我:[差唔多啦.]

Anna:[寫完之後有無嘢做呀?]

我:[無呀]

Anna:[咁...你想唔想現在過嚟我呢邊呀?]

我:[嘩!!呢個充滿挑逗性嘅問題,唔會有男人say no架喎.]

Anna:[咁我等你過呢,Bye.]

聽完電話仲唔嗱嗱啉攞埋明天返工啲衫狗衝過去Anna屋企咩,
有時都會有啲例外情況係平日喺Anna屋企過夜架.

當做完啲想做嘅嘢之後,
咩話?想睇過程?太三級唔寫啦,再寫變鹹故架啦.

我訓係床問咗佢一個問題

我:[我有啲嘢想問你,不過唔知點開口....]

Anna:[問乜嘢呀?]

我:[你有無食避孕藥架?]

Anna:[你唔知呢個世界有樣嘢叫安全期架?]

我:[唔知喎]

Anna:[總之你放心啦,唔係做乜叫你過呢?]

我:[咁~~咪要喺呢個時期做多啲]

Anna笑笑口講;[你得咩?]

我:[作為一個正常血氣方剛嘅男人,我現在就用行動証明俾你睇嚇.]

Anna:[喂呀~~~]
結果嗰晚....好攰,過程?都係太三級唔寫,總之第二日返工攰到死狗咁.
無風無浪咁又一星期,又係正常返工嘅日子,
平日我同Anna都會喺碼頭等埋一齊先上船.

不過今日見到佢好似有啲唔對路,木無表情.
我諗係唔係女人啲唔舒服日子,不過又唔似,咁耐我都唔覺佢會俾呢啲嘢影響心情.

我:[做乜事,今日唔出聲?]

Anna:[我要去睇醫生]

我:[嚇!邊度唔舒服呀?]

Anna:[我period仲未嚟.]

我聽到呢句說話個心離一離.大鑊!!玩大咗,攪出人命.

我拖實佢隻手,我感覺到佢手震.

佢望實我講咗三個字

Anna:[唔可以]

佢跟住自言自語講:[我唔可以有BB架,唔得,唔可以.]

我攬實佢同佢講:[無事架,睇咗醫生先.]

雖然我係咁講,但係我同佢諗緊嘅嘢係一樣,唔可以有BB架

現在呢個環境絕對唔可以架.

我地兩個都即刻請假,

我陪住Anna一齊去醫務所,登記之後坐係梳化等叫名.

我一直都拖實Anna隻手,當姑娘叫佢名時佢震咗一嚇,我從未見過佢咁驚.
原本我想同佢一齊入去,不過姑娘唔俾,咁我只好坐係出面等,

嗰一刻每一秒都好似行得好慢咁,坐又唔係行又唔係.
係心入面只係不停咁講,唔好呀,一定唔可以中呀.
等咗唔知幾耐終於見Anna行咗出呢

我即刻衝上前問:[點呀?]
Anna:[一陣先講,]

咁呢度始終係醫務所,唔方便,攞完藥俾咗錢我地就走.

一路Anna都無出聲,我心諗PK啦,睇嚟中咗.

我地行到去一個小公園坐低咗,
睇見公園入面啲小朋友好開心咁走嚟走去.
我個心就更亂,點算?

Anna開口問我先:[你鍾唔鍾意小朋友?]

今次真係PK,點答?

我:[我唔知,]

Anna:[你想唔想要小朋友?]

我:[我都唔知,]

Anna:[如果....我係話如果,我真係有咗BB,咁你打算點?]

我攬實佢講:[我從來無諗過咁快就會做人老豆,我知你唔想要小朋友,如果你唔要我會尊重你決定,但係如果你決定要生佢出呢我會照顧佢同你一世,如果將來你決定同Paul一齊我依然會照顧佢一世.]

我:[你做任何決定我都會支持]

Anna:[對唔住,我唔可以有小朋友,我事業現在先上咗軌道,我唔可以係呢一刻停低.]

我:[唔緊要,我知你事業心重.]

Anna:[但係如果我現在唔要,以後都未必再有機會有.]

我:[如果到時想要小朋友咪領養囉]

Anna:[你唔會後悔?]

我:[唔會]
Anna好大力攬實我.

我:[咁幾時做手術?]
佢笑笑口講:[做乜手術呀?]

我:[唔要個BB囉]

Anna:[咩BB?]

我:[你唔係話.....哦你玩我]

Anna:[我想睇嚇你乜嘢反應之嗎.]

我:[有無攪錯呀,攞呢啲嘢呢玩.]

Anna:[唔好嬲啦.]

我:[唔嬲就奇.]

Anna捉實我錫咗我一啖

我:[你下次再搵呢啲嘢玩就唔理你.]
佢又笑笑口望住我.

Anna:[其實我初初真係好驚,如果有咗,我真係唔知點做好,又唔知你點諗.
今次好采係食炸糊,不過我係講真,我唔想生小朋友,]

我:[我明]

Anna:[不過都好,有意外收穫]

我:[咩嘢意外收穫?]

Anna:[你話會照顧我同BB一世囉,仲話如果我揀Paul你都會照顧佢一世,
我聽到好開心,邊有人咁傻架.]

我:[我就係咁傻嘅人]

我地慢慢行出公園:[我地現在去邊呀?返工?]

Anna:[唔...都請咗假,咁今日就放鬆嚇,我地去睇戲食飯?]

我:[我聽錯咋,剛才啲嘢真係出自你個工作狂口?]

Anna:[你講過,間唔中都要放縱嚇自己架,係唔係]